Isang mainit na pagsalubong sa inyong lahat, mga giliw naming tagapanood: mula sa
butihing ina ng ating Pamantasan, Dr. Shirley C. Agrupis, mga kasapi ng Konsehong
Pang-administratibo, mga mag-aaral, kapwa kawani ng pamantasan, mga panauhin,
at lahat ng aming mga minamahal… Tayong lahat ay nagtipon-tipon ngayon sa nagiisang Teatro Ilocandia upang sumama sa isang paglalakbay sa mundo ng drama at
imahinasyon. Lubos ang aming kagalakan at pananabik na ipinaabot namin ang taospusong pagbati sa inyong lahat sa katangi-tanging pagkakataon na ito.
Mula sa Center for Human Movement Studies, nais kong ipaabot ang aming taospusong pagbati sa direktor, mga aktor, at mga ibang kasamahan natin sa likod ng
bawat eksena. Ngayong hapon, ang tanghalan ay nakahanda na upang magpausbong
sa salamangka ng pagsasalaysay, na binigyang-buhay ng mga masining nating
kapamilya na nagbuwis ng kanilang puso at kaluluwa sa pagbuo ng isang
ekstraordinaryong produksiyong-pang-entablado. Kami ay masaya na kayo ang
aming mga gabay patungo sa isang pakikipagsapalarang puno ng takot, hilakbot, at
mga imaheng mananatili sa panginorin pagkatapos ng pagtatanghal. Sa puntong ito,
aking ipinapaalala na ang palabas na ito ay hindi para sa mga mahihina ang puso, at
kinauukulang pagiingat ang kinakailangan para sa mga matatakutin at magugulatin.
Ang pagtatanghal ngayon ng Teatro Normal Laboratoryo ay katibayan ng ibayong
dedikasyon, maalab na determinasyon, at di-mabilang na oras ng pagpupunyagi. Ang
kanilang pag-ibig sa sining ng teatro ay makikita, maririnig, at mararamdaman sa
bawat linya, bawat nota, at bawat aspeto ng produksyong ito. Kung kaya, sampu ng
mga kasapi ng Teatro Normal Laboratoryo, ako ay nagpapasalamat sa inyong
pagtangkilik at hindi pagbabaratilyo sa dugo at pawis ng ating mga minamahal na
tagapagtanghal.
Sa ating panonood, sama-sama nating ipagbunyi ang ibat-ibang kulay ng buhay na
pagtatanghal, na kung saan ang bawat tibok ng puso, bawat hininga, at bawat sandali
ay pinagsasaluhan ng entablado at ng mga manonood.
Sa puntong ito ihanda na ang ating mga sarili at ating tunghayan ang kuwento ng
ANG UNANG ASWANG. Muli, isang mainit na pagbati sa Teatro Normal Laboratoryo
para sa isa na naming natatanging likhang-sining ikinararangal at ipinagmamalaki ng
ating pamantasan. Mabuhay tayong lahat na masaya, malusog, sama-sama, at
umaangat! Maligayang panonood sa inyong lahat.