LITURGIA NING AMANU
MUMUNANG PAMAMASA
“Aliua ing imalan yu ing gagabakan yu, nune ing pusu yu.”
Pamamasang ibat king Libru ning Propeta Joel
2:12-18
“Inia ngeni, ngeni pa, ing Guinu ya ing magsalita
magbalik kayu kanaku kambe ning kabilugan yung pusu,
mag-ayuno, pasitangis, at magkalungkut kayu.”
Aliua ing imalan a susulud yu ing gagabakan yu,
nune ring pusu yu ilang gabakan yu,
king Guinung Dios yu, magbalik na kayung pasibayu,
uling paua yang lunus ampon pakalulu,
banayad king pamimua, kitmuan ya king ganaka,
at makasadiang miyurung king makatibing parusa.
Ninu ing makasabing e ya magbalik,
e ya mo manaliua isip ing Guinung Dios yu,
ban ting upayang king pamaglabas na maglakuan
yang metung a kalam, kalam a agamit yung miuman
king pamidaun ain a kakanan
at ain a inuman king Guinung Dios yu?
Tiupan ye ing tambuli king Sion!
Mibandu kayung masusing pamagayuno,
maus kayung banal a pamitipun,
tipunan yu la ring tau, payaus ye ing meto balen,
paniausan yu lang mitipun ding makatua,
ring sablang anak tipunan yu la,
ua, pati na ring bingut a pasusuan pa.
Pati na ring bayung kasal, payaus yu lang lumual bale ra,
ban ila man datang la.
Pilatan ning portiko at ning altar ding pari,
ding ministru ning Guinu, tumangis la.
Bustan yung sabian da,
“Patauaran me, Guinu, ing balen mu!
E me paburen mibibilad a kamarinayan ing sarili mung pibandian,
ban ding bansa e ra kami libakan at gauan pikailian,
ban e ra asabi ring tau nukarin pa man:
„Antayu mo ing Dios da?‟”
Ing Guinu, kanita, lingkas ya lugud king labuad na,
melunus ya king balen a pinili na.
Ing Amanu ning Guinu.
Salamat king Dios
DALIT A PAKIBAT
51:3-4, 5-6ab, 12-13, 14 at 17
PAKALULUAN MU KAMI, O GUINU,
ULING MIKASALA KAMI.
Malunus ka kanaku, O Dios,
agpang king pakalulu mu.
Pauli ning maragul ganaka mu,
papdan mu ing sablang deuakan ku
Uasan mu kung malinis king sablang deuakan ku,
king pamikasala ku, linisan mu ku. R.
Uling akilala ku la ring deuakan ku,
atiung parati king kaisipan ku ing pamikasala ku.
Ika kabud ing pikasalanan ku, ala nang aliua pa;
ing marok depatan ku king arapan mu. R.
O Dios, ilalang mu kung metung a pusung malinis,
at dinan mu kung metung a bayu ampon matatag a espiritu.
E mu ku tatabi king arapan mu,
ni e me sana pagkait kanaku ing banal a espiritu mu. R.
Ibalik mu kaku ing kaligayan ning pamagligtas mu,
at papanatilian mu kaku ing diua ning lub a malam.
O Guinu, busnian mu la ring labi ku,
ban ing asbuk ku ipasiag na ing kapurian keka. R.
KADUANG PAMAMASA
“Sumut ko king Dios. Lauan yu, iti ing panaun a karapatdapat.”
Pamamasang ibat king kadua nang Sulat San Pablo
king Kapulungan karin Corinto
Kapatad:
Inia ati kami keti bilang pekakatauan nang Cristo;
anti na mong ing Dios mismu
ya ing mamaus kekayu king kapamilatan mi;
at ing kayausan a ipanasbuk mi kekayu
king lagyu nang Cristo anti ya keni:
sumut na kayu king Dios.
I Cristo ala yang geuang pamikasala,
dapot ing Dios alang-alang kekatamu,
birian neng miritkan king pangamakasalanan tamu,
ban keta king pangayagum tamu kaya,
miritkan tamu king pangamakatuliran ning Dios.
King pangalauk mi king obra na ning Dios,
yayaus mi misan pa king kapanandaman yu
ing e yu paburen masayang ing tinggap yung
grasya king Dios. Uling sasabian na:
King panaun a karapatdapat, pekiramdaman da ka;
king aldo ning kaligtasan seupan da ka.
Lauan yu, ing ngeni ya na ing panaun a karapatdapat.
Iti ya na ing aldo ning kaligtasan!
Ing Amanu ning Guinu.
Salamat king Dios
5:20-6:2
AKLAMASYUN NING BALEN BAYU ING MAYAP A BALITA
Lauan ya ing Dalit 95:8
E yu la kakabat ding pusu yu ngeni,
nune makiramdam kayu king siuala ning Guinu.
MAYAP A BALITA
“Ing Ibpa yung makakit aguiang king makalihim, ablasan na kayu.”
Pamamasang ibat king Mayap a Balita agpang kang San Mateo.
6:1-6,16-18
King panaun a ita:
I Jesus ngana karing alagad na:
“E yu pagparangalan king arapan ning balen
ing nanu mang dapat yung kabanalan
ban mayaus la pansin kekayu ring tau.
Uling king makanian a paralan
ala na kayung panenayan pang ablas
king Ibpa yung atiu banua.
Inia potang maglimus kayu king metung a pakakalulu,
e yu gagauan maragul a bage;
anti kanian ing daraptan da ring hipokrita
karing sinagoga at karing dalan.
Daraptan da iti ba lang manikuang kapurian karing tau.
Sasabian kung tutu kekayu, tinggap da na keti
ing karelang ablas. Dapot pin nung maglimus kayu,
daptan yu, ita sanang agiang ing matalik yung diling
kakaluguran e na abalu, nune sukat manatiling makalihim.
At ing Ibpa yu a manakit king sablang mararapat
king makalihim, ablasanan na kayu.
“Nung manalangin na ko man,
e yu la apusan ding hipokrita!
Mapad lang tatalakad at manalangin kilub ding
sinagoga at karing suluk ding dalan
ban kanita akit da la ring sablang tau.
Sasabian kung tutu kekayu,
tinggap da na keti ing ablas da.
Dapot ikayu nung manalangin kayu,
munta kayu karing kuartu yu, isara ye ing pasbul,
at manalangin kayu king Ibpa yung e mayayakit.
At ing Ibpa yu a manakit king sablang daraptan yu
king makalihim, ablasanan na kayu.
“Nung mag-ayuno kayu,
e kayu malulam a lupa katulad da ring hipokrita.
Lakadlakad lang lupang danupan
ban keta abalu da ring sablang tau king mag-ayuno
lapin. Sasabian kung tutu kekayu,
tinggap da na keti ing karelang ablas.
Dapot neng magayuno kayu, manimu at maniukle
kayung miamasamas, ban kanita e ra abalu ring aliua
king ikayu magayuno kayu;
bukud mung ing Ibpa yung manakit king sablang
mararapat king makalihim ya ing makibalu.
At ing Ibpa yung manakit king sablang mararapat
king makalihim ablasanan na kayu.
Ing Mayap a Balita ning Guinu.
Kapurian keka, O Kristo
HOMILIA
Sukat atin homilia neng Domingo at karing fiestang pañgilinan; masanting mu naman nung
karing aliuang aldo mika atin mu naman homilia.
PANALANGIN DING MALDA
Ing ministro ngana:
Kapatad, sukat tamung manalangin karing sablang panaun,
dapot lalung-lalu na kaniting panaun ning Cuaresma:
sukat tamung tapat magbante kambe nang Cristo
at manalangin king Ibpa tamu.
M. GUINU, PAKIRAMDAMAN MU ING PANALANGIN MI.
1. Ban ding Cristiano nu karin man
makibat la king amun ning amanu ning Dios
kaniting banal a panaun,
manalangin tamu king Guinu:
2.
Ban ding tau nu karin man magobra la para
king kapayapan ban agaua da la reting aldo
kalugud-lugud a panaun ning saup ning
Dios at ning kaligtasan,
manalangin tamu king Guinu:
3.
Ban ding sablang mikasala o
meligamgam na o merimla
na kasalpantayanan, mibalik la lub king
Dios kaniting panaun ning pamakisut,
manalangin tamu king Guinu:
Ban ita mu ngan mabiasa tamung sumisi at
paingulut king kasalanan
king kabilugan tamung pusu,
at maglarin king kasiran a pepasari ra reti
king bie ring kapatad tamu,
manalangin tamu king Guinu:
L- Ngeni aduan tamu ing sarili tang kapagnasan
4.
Ing pari ngana:
bpang atiu banua, ing sala ning katutuan mu
aslagan na sana ing dalumdum ding mata
ming makasalanan. Iting panaun
ning pamanisi yatad na sana kekami
ing bendisyun ning pamamatauad mu
ampon ing kalam ning sala mu.
Iti aduan mi king kapamilatan nang Cristong Guinu mi.
M. Amen.