Epekto ng Makabagong Teknolohiya sa Komunikasyon sa Pag-aaral ng Wikang Filipino ng mga Estudyante sa ika-11 na baitang ng Holy Angel University I. Introduksiyon Ang wika ay maikukumpara sa oras. Hindi napipigilan, patuloy lang sa paghakbang. Bawat oras, minuto, at segundo, patuloy itong umuusbong at nagbabago. Sa paglipas ng mga panahon, napakaraming bagay ang patuloy pang lumalago, napapabilis, nagiging makabago mula sa nakasanayan na, at parte na ito ng tinatawag na modernisasyon (Encyclopedia Britannica, 2020). Ang wika ay isang representasyon ng kultura, pagkatao, at higit sa lahat, ang pagkakakilanlan bilang isang Pilipino. Tulad ng sinabi ni Salicru (2017), wika ang pinakamabisang instrumento sa anumang gawain gaya ng pag-unlad, pagtuklas, pakikipagkapwa-tao, pakikipagtalastasan at iba pa. Kung walang wika, mahihirapang magkaintindihan ang bawat isa na hahantong lamang sa kaguluhan at kalituhan ng mga tao sa bansa. Sa pag-usbong ng mga makabagong teknolohiya, parami rin nang parami ang mga pagbabagong nagaganap sa paggamit ng wikang Filipino. Hindi na maikakaila na ang paggamit ng mga makabagong teknolohiya ay naging parte na rin ng pangaraw-araw na pamumuhay ng mga tao. Ayon kay Montemayor (2018), sa pag-usbong ng mga pag-unlad ng teknolohiya sa bansa, parami nang parami ang mga mag-aaral ngayon ang nahihirapang gumamit ng wikang Filipino sa pasalita at pasulat na komunikasyon. Ang teknolohiya ay maaaring gamitin ng mga tagapagturo ng wika upang mapahusay ang pagtuturo, pagsasanay, at pagkahasa sa wika (ACTFL, 2017). Dahil sa teknolohiya, ang mga mag-aaral ay naka-pagbabasa, nakakapakinig, at nakatitingin ng tunay na nakaka-engganyo at napapanahong mga materyal mula sa target na kultura. Ayon naman kay Alleen (2019), naaapektuhan ng teknolohiya kung paano matuto, makipag komunikasyon, at kung paano mag-isip ang mga tao. Gumagamit ang mga tao ng teknolohiya sa trabaho, edukasyon, pang-aliw, komunikasyon at marami pang iba. Bilang karagdagan, ayon sa The Editorial Team (2021), mayroong anim na karaniwang klase ng teknolohiya. Ito ay ang komunikasyon, elektrikal, enerhiya, mekanikal, medikal, at transportasyon. And modernong teknolohiya sa komunikasyon ay pinalolooban ng mga kagamitan gaya ng telepono, kompyuter, internet, at iba pa. Mas maraming barayti ng wika ang umusbong at nagsisimula na ring lumikha ng mga panibagong wika na naimbento ng sariling kaisipan dahil sa gamit ng mga modernong teknolohiya sa komunikasyon. Dito nagsisimulang sumabay ang mga tao sa kung ano ang nauuso at hindi kalauna’y nagagaya na rin nila. Ayon kay Swan (2017), ang social media ay isa sa mga makabagong teknolohiya na nakakalap ng maraming reklamo hinggil sa negatibong epekto nito sa paggamit at pagbabaybay ng gramatika. Isa ito sa mga naging sanhi ng paglikha ng mga wikang pumipigil sa tao na higit na maunawaan ang isa’t-isa at nagdulot ng pagkalimot ng mga orihinal na pinagmulan ng mga salita. Ayon kina Carreon et al. (2017), ang wika ay buhay o dinamiko, kaya naman hindi na nakapagtataka na sumasabay sa pagbabago ng panahon ang wika at malaya itong tumatanggap ng mga pagbabago upang patuloy na yumaman at yumabong. Dahil sa mga pagbabagong nangyayari sa modernong panahon, hindi maipagkakaila na ang mga kabataan ay napakahusay sa paggamit ng makabagong teknolohiya sa larangan ng komunikasyon. Bilang patunay, ayon sa pag-aaral ng The Royal Children’s Hospital Melbourne (2017), ang mga kabataang edad 1318 taong gulang ay gumagamit ng gadyet ng hindi baba sa anim na oras sa loob ng isang araw lamang. Gayunpaman, maraming kabataan din ang nahihirapang gumamit ng wikang Filipino sa pasalita o pasulat na uri ng komunikasyon, dahil tila hindi praktikal na gamitin ang vernacular sa mga talakayan na may kaugnayan sa modernong edukasyon at pamumuhay. Kung hihiramin ang mga salita ni Gomes (2018), malaki ang naging gampanin ng makabagong teknolohiya sa pagbabago ng ating wika. Mula sa mga naiimbentiong bagong salita na may iba’t-ibang kahulugan na bago rin sa pandinig at madalas na nakikita sa teknolohiya ay nakakasanayan na rin ng mga tao lalo na ng mga kabataan na gamitin ito sa pang-araw-araw na pamumuhay, sa puntong nahihirapan at nalilimutan na nilang gamitin ang sariling wika, ang wikang Filipino. Samakatuwid, masasabing ang mundong ginagalawan sa kasalukuyan ay napakalaki na ng naitulong sa teknolohiya para mapaunlad ang sariling wika at bansa. Kaya naman bilang paghahanda sa mga pagbabago pang magaganap sa hinaharap, layunin ng pag-aaral na ito ang kumalap ng mga impormasyong kinakailangan para tuklasin ang epekto ng makabagong teknolohiya sa pag-aaral ng wikang Filipino ng mga estudyante sa ika-11 na baitang ng Holy Angel University. Ito ay naglalayon na maging gabay at daan upang hindi tuluyang makalimutan ng mga Pilipino ang wika at kultura na ating kinagisnan dahil lamang sa ito ay naapektuhan na ng modernisasyon. II. Batayang Teoretikal Ang pananaliksik na may paksang, Epekto ng Makabagong Teknolohiya sa Komunikasyon sa Pag-aaral ng Wikang Filipino ng mga Estudyante sa ika-11 na baitang ng Holy Angel University ay maaaring ibatay at suportahan sa mga sumusunod na teorya: Ayon sa Substantive Theory ni Jacques Ellul at Martin Heidegger, ang teknolohiya ay kabilang na sa ating kultura na binago ang social world bilang object of control. Nabanggit rin sa teoryang ito na ang teknolohiya ay isang malaking parte na ng ating buhay. Ayon naman sa Instrumental Theory ni Jacques Ellul, na nagsasabi na ang teknolohiya ay isang kagamitan na handang tumulong upang makamtan ang ninanais ng isang tao. Ang teknolohiya umano ay ang instrumento lamang na kayang patunayan ng walang pag-aalinlangan dahil ginagamit ito sa maraming paraan para sa ating benepisyo. Base sa mga pananaw at teoryang nabanggit, ipinahihiwatig ng pananaliksik na ito na ang teknolohiya ay nakapagdudulot ng napakalaking epekto sa pag-iisip ng mag-aaral. Nagbibigay ito hindi lamang ng kaalaman ngunit pati na rin ng pansariling kalibangan at kaligayahan. III. Batayang Konseptwal Para sa balangkas ng pag-aaral, ang mga mananaliksik ay lilikom ng mga magiging respondente sa talatanungang ibibigay na may kinalaman sa pagsusuri sa epekto ng makabagong teknolohiya sa pag-aaral ng wikang Filipino. Gagamit din ng gadyet bilang midyum ng gagawing sarbey. Ito ang magsisilbing input ng pag-aaral. Pagkatapos ay dadaan sa proseso ang mga input kung saan ito’y masusing pag-aaralan upang matukoy ang magiging positibo at negatibong epekto ng makabagong teknolohiya sa pag-aaral ng wikang Filipino ng mga nasabing mag-aaral at upang tukuyin ng mga mananaliksik ang maaaring mas mainam na paraan upang lalo pa itong mapag-unlad. Input a) respondente/estudyante Proseso Awtput a) pagbabasa at b) edad pagkalap ng mga “Epekto ng Makabagong c) kasarian kaugnay na pag-aaral Teknolohiya sa Pag-aaral d) gadyet e) kabuuang oras sa paggamit ng teknolohiya f) unang wika/mother tongue b) preparasyon ng mga ng Wikang Filipino ng materyal at pagbuo ng mga Estudyante sa ika-11 mga katanungan, na baitang ng Holy Angel c) paghahanap ng mga University” respondente ng gagawing sarbey, g) epekto ng makabagong d) pagdo-dokumento ng teknolohiya sa pag-aaral ng wikang Filipino datos e) pagsusuri ng datos f) interpretasyon ng resulta gamit ang talahanayan at graphs IV. Paglalahad ng Suliranin Ang pangunahing layunin ng pag-aaral na ito ay maihain ang epekto ng makabagong teknolohiya sa pag-aaral ng wikang Filipino ng mga estudyante sa ika-11 na baitang ng Holy Angel University. Hinahangad din ng mga mananaliksik na mailarawan kung nakabubuti ba o nakasasama sa pag-aaral ng wikang Filipino ang makabagong teknolohiya. Narito ang ilang mga katanungan na sumibol sa isipan ng mga mananaliksik upang matugunan ang nasabing layunin: 1. Ano ang propayl ng mga respondente ayon sa: 1.1 edad; 1.2 kasarian; 1.3 strand; 2. Anu-ano ang saloobin ng mga mag-aaral sa makabagong teknolohiya at pag-aaral ng wikang Filipino? 3. Ano ang lawak ng pagpapahalaga ng mga respondente sa wikang Filipino batay sa sumusunod: 3.1 interes/kawilihan sa wika; 3.2 motibasyon sa pag-aaral nito; at 3.3 paggamit ng wikang Filipino? 4. Paano naaapektuhan ng paggamit ng teknolohiya ang pag-aaral ng wikang Filipino? 5. Epekto ba ng makabagong teknolohiya ang tuluyang pagkalimot ng mga lumang salita? 6. Nakatutulong ba ang makabagong teknolohiya sa pag-unlad ng kaalaman ng mga magaaral sa wikang Filipino? V. Kahalagahan ng Pag-aaral Malaki ang epekto ng makabagong teknolohiya sa pag-aaral ng wikang Filipino. Ito ay maaaring nakabubuti o maaari rin namang nakasasama. Kung kaya’t ang pag-aaral na ito ay inaasahang magiging kapaki-pakinabang sa mga sumusunod: Estudyante – Ang pag-aaral na ito ay makatutulong upang mapayabong ang kaalaman ng mga estudyante sa kabutihang naidudulot ng pagpapahalaga sa wikang Filipino. Makatutulong din ito upang mamulat ang isipan ng bawat estudyante tungkol sa responsableng paggamit ng teknolohiya bilang instrumento ng kabuuang pagkahubog ng sarili hinggil sa konstekto ng wikang Filipino. Administrasyon ng Paaralan – Sa pamamagitan ng pananaliksik na ito, ang administrasyon ng paaralan ay makagagawa ng mga hakbang sa paghikayat ng mga estudyante na muling panumbalikin ang interes sa pag-aaral ng wikang Filipino. Mamamayang Pilipino – Magsisilbing patnubay ng mga mamamayang Pilipino ang pagaaral na ito upang panatilihin sa kanilang isipan ang kinagisnang wika at kultura ng Pilipinas. Makatutulong din ito upang kanilang pahalagahan ang wikang Filipino at hindi magpalamon sa bagong sistema ng makabagong mundo. Mananaliksik – Bilang mga mananaliksik, ang pag-aaral na ito ay makatutulong upang magkaroon ng dagdag kaalaman na magbibigay-kalinawagan ukol sa epekto ng makabagong teknolohiya sa pag-aaral ng wikang Filipino. Bukod pa rito, makakagawa rin ang mga mananaliksik ng sariling mga hakbang upang mapanatili ang kagandahan, kahalagahan, at sigla ng wikang Filipino sa bansa. Mananaliksik sa hinaharap – Ang pananaliksik na ito ay magiging kapaki-pakinabang sa mga susunod na mananaliksik na nangangailangan o nagnanais makakalap ng mga karagdagang impormasyon at ideya sa kauring paksa. Bilang karagdagan, maaari pa nilang pagbutihin o dagdagan ang mga bagay na pinaniniwalaan nilang makakabuti para maging matagumpay ang kanilang pananaliksik. VI. Saklaw at Limitasyon Ang pag-aaral na ito ay nakatuon sa paglalahad ng epekto ng makabagong teknolohiya sa pag-aaral ng wikang Filipino ng mga estudyante sa ika-11 baitang ng Holy Angel University. May kabuuang limangpung mag-aaral (50) na mula sa limang strand (10 bawat strand) ang naging tagatugon ng sarbey na isinagawa ng mga mananaliksik sa pag-aaral na ito. Ang nasabing sarbey ay naglalayong makuha ang nangungunang positibo at negatibong epekto ng paggamit ng makabagong teknolohiya sa pag-aaral ng wikang Filipino ng mga estudyante. Hinahangad din ng pag-aaral na ito na masuri ang pananaw at persepsyon ng mga mag-aaral patungkol sa makabagong teknolohiya at pag-aaral ng wikang Filipino sa kasalukuyang panahon. VII. Kahulugan ng Terminolohiya Mag-aaral/Respondente. Sa pag-aaral na ito ang mga tinutukoy na mag-aaral o respondiente ay ang mga nasa ika-11 na baitang ng Holy Angel University na bahagi ng TVL, ABM, STEM, HUMSS strands. Makabagong Teknolohiya. Ito ay ang pagsulong ng lumang teknolohiya na may mga bagong dagdag at pagbabago (Swalih, 2021). Teknolohiya. Isang kasangkapan sa kaalaman na sumasaklaw sa mga isyu sa pamamaraan at organisasyon ng pagbabago. Nagsisikap na matugunan ang mga pangangailangan ng tao at panlipunan sa harap ng kawalan ng katiyakan (Agromassidayu, 2022). Wika. Isang balangkas na masistema ng mga tunog na binibigkas at inayos sa arbitraryong pamamaraan para makabuo ng mga titik na pagsasama-samahin upang makagawa ng isang salita na maaaring gamitin sa pagpapahayag ng damdamin o saloobin (Gleason, 2021). Vernacular. Isang anyo ng wika na kadalasang ginagamit ng isang partikular na grupo ng mga nagsasalita, lalo na sa mga impormal na sitwasyon (Cambridge Dictionary, n.d.). Reperensiya ACTFL. (2017). The role of technology in language learning. https://www.actfl.org/advocacy/actfl-position-statements/the-role-technologylanguagelearning#:~:text=Through%20the%20purposeful%20use%20of,speakers%20of%20the %20target%20language Agromassidayu. (2022, April 11). Makabagong makabagong teknolohiya: Kahulugan at saklaw. agromassidayu.com. https://tgl.agromassidayu.com/sovremennaya-innovacionnayatehnologiya-opredelenie-i-sfera-primeneniya-a-060367#menu-4 Allen, M. (2019). Technological influence on society. BCTV. https://www.bctv.org/2019/11/07/technological-influence-on-society/ Cambridge Dictionary. (n.d.). Vernacular. Cambridge Dictionary | English Dictionary, Translations & Thesaurus. https://dictionary.cambridge.org/us/dictionary/english/vernacular Carreon, M. B., Molines, R.S., De Vega, A.J., David, C.Y., Galang, M.D., Turrano, R.T. (2017). DUPIKAL Komunikasyon at Pananaliksik sa Wika at Kulturang Pilipino Encyclopedia Britannica. (2020). Modernization. https://www.britannica.com/topic/modernization/additionalinfo#history Gleason, H. (2021). Ano ang kahulugan Ng wika Ayon Kay Henry Gleason? Panitikan.com.ph. https://www.panitikan.com.ph/ano-ang-kahulugan-ng-wikaayon-kay-henry-gleason Jacques, E. & Heidegger M. (n.d.). Critical theory of technology. Simon Fraser University. https://www.sfu.ca/~andrewf/books/critical_theory_of_technology.pdf The Linguist. (2018, December 10). Language change: The impact of digital technology. https://www.blogs2018.buprojects.uk/jesikagouveiagomes/languagechange-digital-technology/ Montemayor M. (2018). Filipino: A dynamic, evolving language. Philippine News Agency. https://www.pna.gov.ph/articles/1046382 The Royal Children’s Hospital Melbourne. (2017). Technology and teenagers. ReachOut Parents. https://parents.au.reachout.com/skills-to-build/wellbeing/technology-andteenagers Salicru, S. (2017). The most powerful tool for leaders. HRM online. https://www.hrmonline.com.au/section/strategic-hr/powerful-tool-leaderslanguage/ Swalih. (2021, February 5). What is modern technology: Definition and examples. Tech Quintal. https://www.techquintal.com/modern-technology/ Swan, K. (2017, September 23). Social media and its influence on vocabulary and language learning: A case study. ResearchGate. https://www.researchgate.net/publication/344349821_SOCIAL_MEDIA_ AND_ITS_INFLUENCE_ON_VOCABULARY_AND_LANGUAGE_LEARNING_A_CASE _STUDY Technology and teenagers. (n.d.). ReachOut Parents. https://parents.au.reachout.com/skills-tobuild/wellbeing/technology-and-teenagers Mga Miyembro ng Pangkat 2 Carin, Maria Ayna Espinosa, Angel Shane Manalad, Alicia Mae Santos, Angelica Mae