Itse Diane Le Maele A Setswana
1.Maru a se nang tladi malematsa ----> Selo se se keng se tlhagisa kotsi se lebatsa batho maano a go
iphemela motlhang go le thata.
2.Phudufudu e e thamo telele e bolawa ke marumo e se a yone ----> Motho yo o ratang go itsenya mo
dikgannye tsa batho, o a tle a di arabe go ne go sa tshwanela.
3.Phokojwe ga ke a latlha moseselo e le wa gagwe ----> Go thata gore motho a latlhe mokgwa o a
tlholegileng ka one.
4.Ga e ke e gangwa ka mogogorwana namane e le fa ----> Motho ga ke a buelelwa a ntse a le teng.
5.Morogo wa ngwana ga o tlhotshwe ditlhokwa. ----> : Maiteko a ngwana ke go etleediwa, e seng go
kgalwa.
6.Setopo re supa sa nakedi, magogwe re mmega a sule ----> Legodu ke le tshwarwang ka merwalo.
7.Marope a bagale melora, ba bonolo ba tshela ka bonolo jwa bone ----> : Gantsi boganka ga bo
busetse sepe, fa e se mathata fela.
8.Sa monna ga se tshabelwe, ga twe ke mono wa koto ----> Motho ga e ke e re ditsagagwe di falala a
tshabe, ka di a tlhokega, le gone o a be a di bapetse ka bothata.
9.Se tshege yo o oleng, mareledi a sa le pele ----> Se je monate ka mathata a ba bangwe le wena a gago
a sa tla.
10.Mong wa thipa e ja nae, re lebala mmesi ----> Go lebogwa motho yo o dirileng tiro ka botswerere, a
e tlhofofatsa.
11.Setsetsi se bolawa ke namane ----> Motsadi o ka tsenngwa mo mathateng ke ngwana.
12.Molomo o o ja o a bo o roga o mongwe ----> Fa motho a a ja, o dira gore ba bangwe le bone ba
eletse se a se jang.
13.Mosima wa matlhaelathupana, se ileng se a be se ile, lesilo ke moselatedi ----> Ga go thuse sepe go
lelela selo se o sa ka keng wa tlhola o se bona gape.
14.Ga go itsiwe se se budusitseng talane ----> Ka lesego dilo di a tle di siame kwa bofelong, le fa di
simolotse di tlhobosa.
15.Ntlhomole mmutlwa ga se nkute lonao ----> Fa motho a go fa sengwe, ga a re o gogorupe gotlhe.
16.Kgomo ga e ke e nnyela boloko jotlhe ----> Motho ga ke a bua mafoko ka go a lotolotsa, o tle a fe ba
bangwe sebaka sa go ikakanyetsa.
17.Phokojwe go tshela yo o diretsenyana ----> Motho go tshela yo o tlhaga, yo o tsipatsipelang
botshelo.
18.Merogolwane ya tsatsing e kgonwa ke go lela e lebaganye ----> Batho ba ba nang le diphapang ba
tshwanetse go di nnela fatshe, ba di fedisa.
19.Le pelong ga le tshetse ----> Fa motho a na le ngongorego o tshwanetse go e ntsha, gore e se ka ya
mo ja mo moweng.
20.Dinotshi go loma tse di tsentseng ----> Fa o gakalela motho a go kopa sengwe, o be o itse gore o tla
se mo naya.
21.Moroka o sita ka pula ----> Motho fa a re o itse selo, o tswanetse go supa kitso eo ka ditiro.
22.Mookodi wa pula o beelediwa ntlheng tsotlhe ----> Botshelo bo lekwa ka maano otlhe.
23.Mosadi o sa tloleng o itshaba thosola ----> Motho fa a ikitse gore o molato ga ke a ganela, kgotsa a
kwela.
24.Poo ya bogwe e tlhaba ka naka lo sekame ----> Motho fa a atlhola wa ga gabo o atisa go mo
rekegela.
25.Ga e ke e phetsolela nageng ----> Motho e a re a tsofala a sokologele ga gabo.
26.Ga e ke e bopa marobe a a le mabedi ----> Motho ga kake a gola a tloga a boela bonyaneng gape.
27.Matlho mabonana ga se matlhokana ----> Fa batho ba kile ba kopana ga ba ka ke ba tlhola ba
timelelana gape.
28.Lerotse la makopa ga le na kgodu ----> Selo se se kopilweng ga se ke se nna sentsi.
29.Dinama di ya pitseng ka dirwe ----> Mafoko a batla go buiwa ke mong wa one.
30.Kgosi thipa e sega molootsi ----> Fa o gakatsa motho, o itse gore le wena o ka nna a go gakalela,
bogolo jang fa e le moeteledipele.
31.Bogale tsholo, bo a omosiwa ----> Motho fa a galefile, o a tle a rejwe bogale.
32.Montsamaisa bosigo ke mo leboga bo sele ----> Motho yo o go thusang o le mo mathateng, e re o
dule mo go one o mo gopole ka tebogo.
33.Bana ba kgori monokwana o seng, tshika e ya baneng e a kgaoga ----> Batho ba losika fa ba ntse ba
ata ba a timelelana.
34.Mogwe lekaba, ga a tsofale ----> Mogwe ga ka a fetsa go direla ba bogwegadi.
35.Mmapodi ga ipone se se mo tlhogong ----> Go thata gore motho a itshwae diphoso.
36.Kgakakgolo ke na mebala, mebala e dikgakaneng ----> Motsadi o tlotlwa ka go kgabisa bana ba
gagwe, e seng go ikgabisa ene ka nosi.
37.Se nkganang se nthola morwalo ----> Go gongwe fa selo kgotsa motho a go gana, o a ba a go tidisa
matshwenyego kwa pele.
38.Mamina e a re go fela a ye nkong e le nngwe ----> Kgang ya moruthuta e a tle e fele ka bonolo, e
tlhofofaditswe.
39.Maragana teng a bana ba mpa ga a tsenwe ----> Dikomang tsa bana ba lelwapa ga di tsenwe, di ka ya
le motseneledi.
40.Maropeng go a boelwa, go sa boelweng ke maleng ----> Motho ga a tshwanela go boifa go boela ga
gabo, kgotsa kwa a kileng a tshela botoka teng.
41.Seboba re bata sa mokwatla, sa mpa re a mpampetsa ----> Motho o tiisa thupa /katlholo mo go
moditshaba, mo go wa ga gabo o tlhofofatsa letsogo.
42.Mabogo dinku a a thebana ----> Batho ba kgona botshelo ka go thusana.
43.O se bone nong go rakalala godimo, go ya tlase ke ga yone. ----> Le fa motho a ka huma jang, a itse
gore khumo eo e ka nna ya nyelela.
44.Maoto a nong ke phofa ----> Motsadi fa a palelwa o thusiwa ke bana ba gagwe.
45.Tshukudu golo gobe e go isiwa ke ngwana ----> Motsadi o ka tsena mo mathateng ka ntlha ya
ngwana wa gagwe.
46.More wa mafoko ke go buiwa ----> Motho fa a na le ngongorego o tshwanetse go e ntsha, ya buiwa,
ya fela.
47.Phudufudu o rile ke lobelo marota a re ke namile ----> Motho fa a sentse ga ka ke a tshabela molao
ruri.
48.Mosito wa photi o tsosa di letseng ----> Motho o ka butsolosa diphapang tse dikgologolo ka
phosonyana e nnye.
49.Sa mosima se jewa ka yo o thata ----> Selo se se bonwang ka bothata se tshwanetse go fufulelwa.
50.Se a re go tlogelwa tsatsing se ikise moriting ----> Motho fa a tlogetswe ke mothusi/motlhokomedi,
o tlhagafalela ditiro tsa gagwe.
51.Sebodu se lekwa ka legano, sa nko se latsa le tlala ----> Fa batho ba na le kgang, ba tshwanetse go e
nnela fatshe, ba e bua, ba e fetsa.
52.Sedibo se a re se tlala se isiwe banneng ----> Motho fa a le mo mathateng, o botsa maano mo go ba
bangwe/bagolwane.
53.Se botlhoko se lekwa ke ngwana mogolo ----> Ditiro tse di bokete di lebaganngwa le ngwana yo
mogolwane, ka a feta ba bangwe ka tlhaloganyo le thata.
54.Segwaba se isiwa ga sone ke go sololwa ----> Sekoba se gopodiwa ga sone ke go sotlwa le go kgojwa.
55.Sekukuni se bonwa ke sebataladi ----> Le fa modira bosula a ka leka go iphitlha jang, o a tle a feletse a
bonywe ke mongwe.
56.Sekhutlo go boa sa monwana, sa pelo se eta le mong ----> Le fa motho a ka go itshwarela, gone o tla
nna a gakologelwa molato wa gago.
57.Se sa ikelediweng ke sa ntswa sa motho se a ikelediwa ----> Ntswa ga e ke e ediwa fa e bogola, mme
motho ene fa a bua o a fetolwa.
58.Setlhotsa go fola sa podi, sa motho ga se fole ----> Motho ga ke a latlha mokgwa oo maswe, le
mororo phologolo e ka o latlhisiwa.
59.Setshwarwa ke ntswa-pedi ga se thata ----> Tiro e nna motlhofo fa e tshwaraganetswe.
60.Phoko-kgolo ga e tswe ka ngwana wa motho ----> Ga go na yo o batlang gore diphiri tsa ba bangwe di
tswe ka ene.
61.Se ya bogwe se tletse, se boa se tletse ----> Fa motho a batla go fiwa, le ene a fe ba bangwe.
62.Tau e iphutha matlhala e le nosi, fa e na le ditawana mafaratlhatlha ----> Bana ba ka tsenya motsadi
mo mathateng a a retelelwang ke go a arabela, ka ga tsamae nabo gongwe le gongwe kwa ba leng teng.
63.Molema-thite ga se mhodi ----> Motho a simolola kgwebo, a se ka a solofela dipoelo tse dintsi ka
pele.
64.Korwe ga ke je, ke bapalela tsetsi ----> Monna o tshwanetse go gopola mosadi le bana pele ga a
gopola go ijesa.
65.Tau e se nang seboka e siiwa ke none e tlhotsa ----> Motho a se na bathusi o palelwa ke tironyana e
se ya sepe.
66.Mafatlha a nku a itsiwe ke mogami ----> Motho o kgona go itse batho ba a nnang nabo botoka go na
le yo o kgakala nabo.
67.Tau ga e je e dumile, e a re e lela e be e re e tlhaselwe ----> Fa Motho yo mongwe a go ipokela, le
wena o tsamae o mo ipaakanyeditse.
68.Thamaga go tuma di na le beng ----> Batho bangwe ba itsiwe ka ntlha ya ditshika tsa bone tse di
tumileng, kgotsa tse di itsegeng.
69.Thota e se nang Khudutlou, bolobete ba ipha naga ----> Fa moeteledipele a se yo, balatedi ba sala ba
itirela boithatelo.
70.Thupa go fedile ya dikgomo, ga sala ya batho ----> Bana ba tshwanetse go aga ba kgalemelwa, ba sa
lomelediwe.
71.Molemo go tsena wa logare ----> Thuto go tshegediwa ya moruti yo o bogale.
72.Lemme ga le bolae, go bolaya lefifi ----> Le fa o bonye selo se le sennye o itumele, o itse fa go sa
tshwane le tshoo-tshoo!
73.Mphemphe e a lapisa, motho o kgonwa ke sa gagwe ----> Motho o tshwanetse go itirela, e seng go
kopela ruri.
74.Mmatlakgomo kodumela, o etse mathata sediba ----> Motho a batla selo sa botlhokwa o tshwanetse
go nna pelotelele.
75.Tlogatloga e tloga gale, modisa wa kgomo o bolola nayo, thupa ya tsone re e kgetla di eme ---->
Motho o itshupa a sa le mmotlana gore a o tla nna senatla kgotsa eng fela.
76.Tlhapi solofela loraga, metsi a tshwele o a lebile ----> Fa motho yo o ntseng a go thusa a fulara, o
ipaakanyetse go lebagana le mathata a botshelo o le nosi.
77.Meno-masweu polaya e tshega ----> Motho o ka go direla bosula a ntse a tshega le wena.
78.Nkgodi go lelelwa yo o tshotseng ----> Motho go kotswa yo o ka fang batho sengwe/go reediwa yo o
itseng sengwe.
79.Tlou fa e tlodile noka ke tlotwana ----> Moeteledipele ga a tshwanela go batla go laola gongwe le
gongwe.
80.Ngwana wa mmamotho mosidi wa pitsa, re itlotsa ka ene ----> Motho fa a le mo mathateng o gopola
ba ga gabo pele, a be a ikanye mo go bone.
81.Noga ga e latelelwe mosimeng ----> Motho ga ke a latelelwa kwa ga gagwe.
82.Mosadi fa a inama o a be a ikantse mosese wa morago ----> Motho fa a dirisa selo, o tshwanetse a be
a se akanyeditse pele.
83.Go lemala ga namane ke go lala le mmaayo ----> Motho fa a ka nna a nenekediwa o a senyega.
84.Phudufudu ga e tlhatlhelwe mme lemipi la yone le fetwa ke la podi ----> Ngwana yo o itaolang ga
bone tlhokomelo jaaka yo o dumelang go laolwa.
85.Marwaneng go tsenelwa gongwe ----> Tiro e bonolo e semololwa ke botlhe ka nako e le nngwe.
86.Mogoa-Modimo o a o ikgoela ----> Fa o eleletsa motho selo sengwe se se maswe, se a tle se
diragalele wena.
87.Malata a ithuna a ile kgonnye ----> Baho ba mophato ba itherolola fa ba le bosi.
88.Bontshwe ga ba ke ba tlhakanela kutla ----> Batho ba tsoma papadi ga ba ke ba batla go tsamaya
mmogo.
89.Tladi e bogale e tswa marung ----> Kgalefo ya motho e ntsi fa e simologa, fa nako e ntse e feta e a
phofa.
90.Ntswa e bolawa ke mong wa yone ga e na lobelo ----> Motho o sotlwa ke mmusi wa gagwe ga go kwa
a ka tshabelang go mo lemosa.
91.Modimo ga o je nkabo ----> Modimo ga o latlhe ope.
92.Tshukudu ya feta marwana pounama di botlhoko ----> Motho yo o ratang dijo fa a re o kgotshe, e a
be e le fa a lwala.
93.E re go lemoga ngaka, le bolwetsi o bo lemoge ----> E re o tlhanogela mothusi wa gago, o be o itse
gore ga o na go tlhola o kopa thuso mo go ene.
94.Moya-goleele o lefa ka marapo ----> Motho yo o lwalang ka boleele e a tle e re kgabagare a fole.
95.Mmutlwa wa noko o rotolwa ke o mongwe ----> Fa o lantlha selo sa botlhokwa, o be o itse gore go na
le se o tla se emisetsang ka sone.
96.Motse re feta wa balala, wa baruakgomo re tsena ka one ----> Fa motho a le mo mathateng, o kopa
thuso mo go ba a itseng ba ka mo thusa ka sengwe.
97.Mogama kgomo tsa mafisa, o gama a gadimile tsela. ----> Motho yo o adimileng sengwe ga a se dirise
ka phuthulogo, o se dirisa a ntse a itse gore se ka tsewa nako nngwe le nngwe mo go ene.
98.Mmualebe o a bo a bua la gagwe gore monalentle a le tswe. ----> Motho yo o nthsang maikutlo
kgotsa dikakanyo tsa gagwe ga a a tshwanelwa go kgalwa mme o tshwanetsee go letlelelwa gore
megopolo e mentle e tle e itshupe sentle fa gare ga e e sa siamang.