PRAYER
Sa ngalan ng Ama, at ng Anak, at ng Espiritu Santo, Amen
Panginoon, aming Makapangyarihan at Mapagmahal na Ama, ang aming mga puso ay puspos ng kagalakan sa
umagang ito na ipinagkaloob Mo sa amin. Lahat po ng mga bagay na Inyong ibinibigay ay patunay ng Inyong
walang hanggang pagmamahal sa amin.
Salamat po sa araw na ito ng aming pagtatapos, ganundin sa lahat ng mga kaalaman naming natutunan.
Salamat po sa aming mga magulang at pamilya, sa kanilang walang sawang pagsasakripisyo at pagmamahal
sa amin. Salamat po sa aming mga guro, punong-guro at sa bumubuo sa amin paaralan, sa kanilang walang
kapagurang pagtuturo sa amin ng kaalaman at kagandahang-asal. Salamat po sa aming mga kamag-aral at
kaibigan, sa kanilang pagbibigay-buhay sa aming paglalakbay. Salamat po sa aming sintang paaralan, sa
kanyang pag-aaruga at pagbibigay ng pangalawang tahanan.
Ama, Naniniwala po kami na sa aming paglalakbay sa buhay, may mga pagsubok kaming kailangang
lampasan. Batid naming na Ikaw ang aming kalakasan, Ang aming napagdaanan ay daan upang kami ay mas
maging matatag at mabuting magaaral.
Taos-puso po kaming humihingi ng tawad sa lahat ng aming kasalanan. Ang mga ito po ay bunga ng aming
kahinaan. Tulungan Niyo po kaming hanapin ang kapayapaan at yakapin ang kabutihan. Sa araw pong ito ng
aming pagtatapos, lubos po kaming nagpapasalamat Sainyo. Buksan Ninyo po ang aming mga mata upang
makita ang kagandahan sa aming paligid. Buksan din po Ninyo ang aming mga tainga sa pakikinig sa lahat ng
mga mensaheng ibibigay sa pagtitipong ito. Higit sa lahat, buksan Niyo po ang aming mga puso, para mas lalo
naming mahalin ang mga bagay na ipinagkakaloob Niyo sa amin. Sa amin pong mga gagawing desisyon sa
hinaharap, patuloy Niyo po kaming gabayan. Nawa’y gawin mo kaming mga instrumento upang ang Inyong
pag-ibig ay patuloy na manatili sa lahat ng panahon ng aming buhay. Basbasan mo nawa po kaming lahat na
mga magsisipagtapos.
Ang lahat pong ito ay aming ipinapanalangin, sa Pangalan ng Iyong Anak na si Jesus. Amen
Sa ngalan ng Ama, at ng Anak, at ng Espiritu Santo, Amen