PANAHONG PALEOLITIKO Kabilang sa Panahong Paleolitiko ang mga taon mula 400,000 hanggang 8500 BCE. Ang salitang “Paleolitiko” ay mula sa mga salitang Greek na palaios, na nangangahulugang “luma”, at lithos na nangangahulugang “bato”. Samakatuwid ang Panahong Paleolitiko ay nangangahulugang Old Stone Age o Panahon ng Lumang bato. Sa panahong ito nagsimulang gumawa ng mga kagamitang gawa sa bato ang sinaunang tao. Inilalarawn bilang magaspang ang mga kagamitang bato sa panahong ito sapagkat hindi pa gaanong pulido at maayos ang pagkakagawa sa mga kasangkapan. Umaasa sa kalikasan ang mga sinaunang tao sa panahong ito. Pangangaso at pangangalap ng pagkain ang kanilang pangunahing ikinabubuhay. Ang mga pangkat ng kalalakihan ay sama-samang nangaso habang ang kababaihan naman ang nangalap ng pagkain. Lahat ng nakuhang pagkain ay inipon at pinaghatihatian ng mga kasapi ng angkan. Palipat-lipat din ng tirahan ang mga tao noong Panahong Paleolitiko. Tinatawag ang paraan ng pamumuhay na ito na nomadic o lagalag, nangangahulugang walang permanenteng tirahan. Tinawag naman ang mga taong lagalag na nomad. Noong una, nakagawian ng mga sinaunang tao ang pagkain ng hilaw na karne, subalit nagbago ito dulot ng pagkakatuklas ng apoy. Itinuturing na pinakahalagang tuklas sa Panahong Paleolitiko ang paggamit ng apoy. Ayon sa teorya, natuklasan ang apoy dahil sa pagtama ng kidlat sa isang punongkahoy. Nagliyab ito at nabuwal sa isang mabangis na hayop. Nang matikman ng mga sinaunang tao ang lasa ng nalutong karne, nagustuhan nila ito at nagsimulang gumawa ng apoy mula sa pagkiskis ng bato. Kinalaunan, natuklasan din ng mga sinaunang tao ang paggawa ng apoy sa pamamagitan ng paulit-ulit na pagkiskis ng kahoy. Ang kahalagahan ng pagkakatuklas ng apoy ay ang sumusunod. Ginagawa nila itong panakot o pantaboy sa mababangis na hayop; proteksyon ito mula sa malamig na panahon; Nagbibigay liwanag sa madilim na yungib; at Gamit sa pagluluto ng pagkain. Pinatunayan ng mga nahukay na labi sa Indonesia at China ang pamumuhay ng mga sinaunang tao sa kontinente. Batay sa mga nahukay na buto at kasangkapan, masasabing ang Taong Java at Taong Peking ay mahusay na mangangaso at may kaalaman sa paggamit ng apoy. Bihasa rin sa paggawa ng kagamitang bato.