17 DISIEMBRE 25 Texto: Lukas 2:8-18 v 8 Iti dayta a paset ti pagilian, adda sumagmamano nga agpaspastor nga adda idi iti away nga agbambantay kadagiti karneroda iti rabii. v 9 Nagparang2:9 Tob. 5:4. kadakuada ti maysa nga anghel ti Apo, ket sinilnagan ida ti dayag ti Apo. Napalalo ti butengda, v10ngem kinuna ti anghel kadakuada, "Dikay agbuteng! Addaak ditoy a mangyeg kadakayo iti naimbag a damag a pakaragsakanyo, wen, dakayo ken dagiti amin a tattao. v11Ita nga aldaw, ditoy ili ni David, naipasngay ti mangisalakan kadakayo---ni Cristo nga Apo! v12Daytoy ti pagilasinanyo: masarakanyonto ti maysa nga ubing a nabungon iti lampin ken nakaidda iti kulluong." v 13 Pagammoan, adda dakkel a nailangitan a bunggoy a nagparang iti asideg ti anghel. Ikankantada dagiti pagdaydayaw iti Dios: v 14 "Gloria iti Dios iti kangatoan a langit! Ket ditoy daga, kappia ken talna kadagiti tattao a pakaragsakanna!" 18 v 15 Apaman a nakapanaw dagiti angheles nga agsubli sadi langit, kinuna dagiti agpaspastor iti maysa ken maysa, "Intayon idiay Betlehem! Intayo kitaen daytoy napasamak nga impakaammo ti Apo kadatayo!" v 16 Nagdardarasda ngarud a napan. Nasarakanda da Maria ken Jose, ken ti ubing a nakaidda iti kulluong. v17Idi makitada ti maladaga, sinaritada kadakuada ti imbaga ti anghel maipapan iti ubing. v18Nasdaaw amin a nakangngeg iti impadamagda. ++++++++++++++++++++++++++++++++++++++++++++++++++++++++++++++++ Topiko: Dagiti Immuna a Mangaskasaba (The First Evangelists) TI PANNAKAILAWLAWAG TI NASANTOAN A SURAT Kas intay’ rambakan ita ti PASKUA- aldaw a pannakaiyanak ti Mesias wenno ti Mangisalakantayo, ni Apotayo a Jesu-Cristo, agyamantayo met iti biag dagiti immuna a nangikasaba iti daytoy Naimbag a Damag maipapan Kenkuana. Ngem Siasinoda dagitoy? Isuda dagiti AGPASPASTOR. Isuda dagiti immuna a naipakaamoan ti naiyanaken a Messias. Isuda dagiti immuna a nakakita iti daytoy a pasamak. Isuda dagiti immuna a nangipadamag iti pannakaiyanaken ti Messias. Ngem apay nga isuda? 1. ADDA LUGAR TI NAIMBAG A DAMAG KADAKUADA Isuda dagiti nagaget nga agpaspastor. No man pay nabanbannog ti pisikal a bagida, no man pay adda butengda amangan no adda mangdangran kadagiti tarakenda, iti rabii, panawen met tapno aginanada, panagam-amiris kadagiti paspasamak kabayatan ti panangmatmatmatda kadagiti bituen iti tangatang ket aginanada nga addaan talna. Siputantayo: Iti kinaulimek ti rabii, inkeddeng ti Dios nga idanon ti mensahena kadagiti agpaspastor, iti kanito a natalna ti panunotda. Application: Iyeg ti Dios ti mensahe kadagiti tattao a natalna ti panunotda tapno maimdenganda a nalaing ken nalawag ti mensahena. Narigat a maawatan ti mensahe no adu unay ti panpanunuten. Narigat pay a maawat ti mensahe no adu unay pakakumikoman. URAY NAIMBAG UNAY TI DAMAG NO SAAN A NAKASAGANA TI PUSO KEN NAKEM, SAAN LATTA A NAIMBAG TI DAMAG. IKKAN TI LUGAR TI NAIMBAG A DAMAG. (no matter how good the news is if our hearts and our minds are not ready for it, the news still no good. make a space for the good news.) 2. INAWATDA TI NAIMBAG A DAMAG A NAPNOAN RAG-O Kasta unay ti regget dagiti agpaspastor iti nangngegda a naimbag a damag gapuna nga apaman a nakapanaw dagiti angeles a nangidanon kadakuada iti mensahe, kinunada: “ Intayon idiay Betlehem…” (b.15) Application: Napili dagiti agpaspastor gapu ta adda lugar ti MENSAHE ti Dios kadakuada ket naragsakda nga immawat iti mensahe maipapan ken ni Jesus. Saludsudek man kadakayo kakabsat- kumusta ti inawatyo a naimbag a damag? Kasano ti panagsaadna kadakayo? Ania ti riknayo tunggal mangngegyo ti mensahe ti Dios iti dinominggo? Magagarankayo kadi met kadagitoy? Addaankayo kadi ti gagar a makakita ken Jesus? 3. IMBINGAYDA TI NAIMBAG A DAMAG A SITUTURED Apaman a napaneknekan dagiti agpaspastor a pudno ti naipadamag kadakuada—saanda a nagbuteng a nangipadamag met iti daytoy. Saanda a sinayang ti gundaway a kabayatan a nasadiwa pay laeng iti puso ken panunotda ti nasaksian, napaneknekan ken nasarakanda a Jesus, dagus nga impadamagda daytoy. Maysa pay a naimbag unay a makitatayo nga inaramid dagitoy nga agpaspastor isu ti panangipangpangrunada a nangiwaragawag iti naimbag a damag maipapan ken Jesus. Saan man a nalaka agsipud ta nalabit adu ti saan a mamati kadakuada gapu iti kasasaadda kas agpaspastor laeng, nalabit adda panagpeggadda, ngem awan kadagitoy ti nakalapped kadakuada. Imbingayda ti naimbag a damag a situtured, siraragsak ken sipupudno. Application: Napili dagidi nga agpaspastor agsipud ta siraragsak, situtured ken sipupudnoda iti panangibingayda iti naimbag a damag maipapan ken Jesus. Salusod: Ania ti maibagam a naimbag a damag ita a Paskua? PAGGIBUSAN: Kas kadagidiay nga agpaspastor, iti likudan ti kinanumo, ken kinasulinek ti ayanda, nakita ida ti Dios, nagparang kadakuada ti Messias agsipud ta impaayanda ti lugar ti Naimbag a damag iti biagda, inawatda a siraragsak ken imbingayda a situtured daytoy banag a nangipaay iti dakkel a namnama iti sangalubongan. Saan a gapu iti kinabaknang ken titulo ti kualipikasion nga agbalin a mensahero ti naimbag a damag, ti mismo a Naimbag a Damag ti mamagbalin kadatayo a mensaherona . Amen.