Kayamanan
Sa bawat yugto ng ating buhay, ang karangalan ay isang bagay na nagpaluha sa atin nang
hindi natin alam, nagpangiti sa atin nang hindi natin namamalayan at nagbigay insipirasyon sa atin
upang magsikap na marating ang tuktok. Bawat taong nabubuhay dito sa mundong ibabaw ay
nabiyayaan ng karangalang ito, ang ating pamilya.
May iba’t ibang uri ng kayamanan sa mundong ibabaw; pera, alahas, magagarang
kagamitan at magandang tahanan. Ngunit, nag-iisa lang ang itinuturing na tunay na kayamanan na
kaagapay, kasalo at karamay natin sa lahat ng oras at bagay, ang ating pamilya. Sa lahat ng
nararanasan natin, sila ang ating nagiging sandigan pagsubok man o kasiyahan. Ang bawat
pangyayari sa ating buhay ay may kalakip na larawan na siyang magsisilbing alaala sa yugto ng
ating buhay kasama ang ating pamilya. Simula kapanganakan hanggang ngayong nasa wastong
gulang na ay hindi nawawala ang kahalagahan ng larawan. Ipinanganak tayo na walang
kamuwang-muwang ngunit biniyayaan tayo ng mga taong handa tayong mahalin, alagaan at ibigay
ang lahat ng kung anong mayroon sila, handang magsakripisyo upang tayo’y lumaki ng maayos at
nagbigay daan sa atin upang makilala ang Diyos. Ipinapakita nila ang tunay na kahulugan ng pag-
ibig at pamilya sa pagpapadama sa atin ng kanilang kasiyahan noong dumating tayo sa buhay nila.
Sa paglipas ng panahon, marami na tayong nagiging prayoridad at nalilimutan na nating
maglaan ng oras kasama ang ating pamilya. Sa bawat segundong lumilipas, dapat nating
pahalagahan ang buhay ng ating pamilya sapagkat sila ang nagtaguyod, nag-alaga at nagmahal sa
atin ano pa man tayo. Huwag nating kalimutang magbalik tanaw at pasalamatan ang mga taong
sumusuporta sa atin magpahanggang ngayon at mas paigtingin ang pagmamahalan sa ating
pamilya.