TEENAGE PREGNANCY: Pagmulat sa Kabataan mula sa Tanikala ng Lipunan
Sa kasalukuyang henerasyon, hindi maitatangging mas naging lantad ang isyu ng maagang
pagbubuntis na kinasasangkutan ng mga kabataan. Maaari itong maihalintulad sa isang tanikalang
nakabugkos sa lipunang ginagalawan at ng mismong kabataan sapagkat ang teenage pregnancy ay
isang komplikadong isyu na may malalim na implikasyon sa buhay ng mga kabataan.
Kung titingnan sa mas malawak na perspektibo, ang pagbubuntis ng mga kabataan sa
murang edad ay nagdudulot ng mga pangmatagalang epekto sa kanilang mga pangangailangan sa
kalusugan, edukasyon, kapaligiran at kabuhayan. Maaari itong magdulot ng maraming negatibong
epekto sa lipunan. Ilan na lamang dito ay ang pagtaas ng lebel ng kahirapan, pagtaas sa mga
gastusin ng pamahalaan, mas mataas na mga gastusin sa edukasyon, mas mababang edukasyon,
mas mataas na kaso ng krimen, mas mataas na kaso ng pang-aabuso sa bata, mas mataas na sukat
ng pagkamatay ng sanggol, mas mataas na mga kaso ng HIV / AIDS, at iba pang sakit na nauugnay
sa sekswal na pakikipagtalik. Bukod pa rito, may mas malalim pa itong epekto sa buhay ng
mismong kabataang masasangkot sa isyu ng maagang pagbubuntis.
Ang pagdurusa mula sa pagkakaroon ng anak sa napakaagang edad ay maaaring magdulot
ng kabiguan sa kabataan, lalo na sa kaniyang mga pag-aaral at pang-araw-araw na buhay. Ang
mga kabataan ay maaaring magkaroon ng mataas na antas ng pagkabalisa at pagkabagot. Sa
madaling implikasyon, ay maaapektuhan at magkakaroon ng emosyonal na problema ang mga
kabataan dahil dito. Ang pagdurusa ng kabataan dahil sa pagbubuntis ay maaaring magdulot ng
pangmatagalang pagkabalisa sa buhay ng pamilya. Ang mga magulang ay maaaring magkaroon
ng problema sa relasyon na may kanilang anak at sa pagitan ng isa't isa, kung kaya’t nararapat
lamang itong bigyan ng kaukulang pansin. Tunay ngang ang teenage pregnancy ay isang sensitibo
at masalimuot na paksa. Ito ay nagsasangkot ng maraming iba't ibang bagay, kabilang ang pisikal
na kalusugan, emosyonal na kagalingan, at panlipunang koneksyon. Nagpapakita lamang ito na
kailangan nating magkaroon ng kamalayan sa lahat ng mga panganib na nauugnay sa teenage
pregnancy upang mabigyan ang mga kabataan ng pinakamahusay na posibleng impormasyon at
suporta.
Ang teenage pregnancy ay binigyang kahulugan ng mga diksyunaryo bilang ang hindi
gustong pagbubuntis ng isang babae sa kanyang pagdadalaga. Parami ng parami ang kaso ng
teenage pregnancy lalo na sa mga bansang mahihirap tulad ng Pilipinas. Sa kasamaang palad, dahil
sa kakulangan ng sapat na kaalaman ukol sa teenage pregnancy, marami pa rin sa mga kabataan
ang naniniwala na hindi sila mabubuntis kahit na makipagtalik sila ng wala pa sa tamang edad at
hindi pa kasal.
Ngayong nasagot na ang tanong na “ano ang teenage pregnancy”, mas marapat nating
tuunan ng pansin ang mga dahilan sa likod ng maagang pagbubuntis ng mga kabataan sa ngayon.
Narito ang ilan sa mga pangunahing dahilan ng teenage pregnancy. Sa panahon ng pagdadalaga o
pagbibinata, ang mga teenager ay kadalasang nakadarama ng peer pressure na makipagkaibigan at
maging kapareho ng kanilang mga kaedad. Sa maraming mga pagkakataon, ang mga batang ito ay
pumayag na naimpluwensyahan sila na makipagtalik kahit na hindi pa nila lubos na naiintindihan
ang kaakibat na mga resulta ng ganitong mga gawain. Ang mga kabataan ay nakikipagtalik dahil
ang akala nila ay pinagmumukha sila nitong cool at naaayon sa uso. Ngunit kadalasan, ito ay
nauuwi sa hindi inaasahang pagbubuntis.
Posibleng ang isang batang babae ay mas malamang na mabuntis kung limitado o walang
tamang patnubay ng kanyang mga magulang. Ang mga magulang na sobrang busy ay hindi
nakapagbibigay ng tamang gabay sa kanilang mga anak na gumagawa ng importanteng mga
desisyon sa buhay, halimbawa ay sa maagang pakikipagtalik at kung ano ang teenage pregnancy.
Kapag ang isang bata ay hindi komportable na sabihin ang kaniyang problema dahil sa bawal na
pag usapan ang sex sa bahay, o kaya naman sobrang busy ng kanyang mga magulang para dito,
maghahanap siya ng mga kasagutan sa ganitong mga isyu sa kapwa niya mga kaedad. Pwede itong
mauwi sa palitan ng maling mga impormasyon na maaaring mauwi sa maagang pagbubuntis.
Bukod pa rito, ang industriya ng pelikula at ang media ay maaaring makadagdag sa mga
kaso ng maagang pagbubuntis dahil sa pinagaganda nito ang itsura ng maagang pakikipagtalik at
pagbubuntis sa mga panoorin sa TV at sine. Ang mga pelikulang nagtatampok sa maagang
pagbubuntis bilang isang katanggap-tanggap na sitwasyon ay nanghihikayat sa mga kabataan na
subukan ang walang habas na mga kaugalian sa pakikipagtalik. Ang mga kabataang hindi naturuan
ng tama tungkol sa sex ay mas malamang na maging biktima ng hindi ginusto ang pagbubuntis.
May mga kabataang hindi pa lubos na nauunawaan ang biyolohikal at emosyonal na mga aspeto
na kaakibat ng pakikipagtalik. Ang mga kabataang ito ay malamang na nakakuha ng maling mga
impormasyon galing sa mga kaibigan, mga video, telenovela o mga pelikula. Sa kadalasan, ang
mga teenager ay wala ng tamang kaalaman para makagawa ng tamang mga desisyon kung
nakikipagtalik sila o hindi. Ang pag inom ng alak ng mga kabataan ay pwedeng mauwi sa hindi
gusto ang pagbubuntis. Maraming mga kabataan ang nag eksperimento sa droga at alak. Ang pag
inom ay nag papahina ng kakayahan ng kabataan na kontolin ang bugso ng kanilang mga
damdamin, na siyang dahilan ng higit sa 75% na mga kaso ng teenage pregnancy.
Nababahala ang Population Commission sa pagtaas ng bilang ng teenage pregnancy sa
bansa dahil pabigat umano ito sa ekonomiya ng Pilipinas. Ayon pa sa datos ng Philippine Statistics
Authority, 200,000 Pilipinong teenager ang nabubuntis taon-taon mula 2011 hanggang 2015.
Katumbas nito ay isang milyon sa loob ng limang taon. Ayon sa PopCom, nakababahala ito dahil
magiging pabigat umano ang sitwasyon sa ekonomiya ng bansa. Sa katunayan, sa pag-aaral ng
United Nations Population Fund, higit Php 33 bilyon ang maaaring mawawalang kita sa mga
pamilyang Pilipino, at pati na sa kalakal ng bansa kapag ang pinuno ng tahanan ay isang menor de
edad.Pero naniniwala ang PopCom, hindi porke't nabuntis ng maaga ay magiging habambuhay ng
pasanin sa lipunan. Kaya isinusulong ng ahensya sa Kongreso na maipasa ang "Teen Pregnancy
Prevention Law" na tutulong sa mga batang ina na magkaroon ng magandang kinabukasan. Kung
sakaling maisabatas, magkakaroon ng komprehensibong programa para tulungan ang mga batang
ina. Pwede na rin silang bumalik sa pag-aaral o 'di naman kaya'y magsimula ng negosyo, dagdag
ng ahensya. Ayon sa PopCom, mahalaga ang tumatalakay sa elementarya pa lamang ang
reproductive health education upang maging maalam ang kabataan tungkol sa pagbubuntis at
pagsisimula ng pamilya. Mahalaga rin anila ang suporta ng pamahalaan sa mga batang ina upang
mabigyan sila ng pagkakataong maging produktibong mamamayan.
Maraming pagbabagong nagaganap sa pisikal at emosyonal na kalagayan ng isang
nagdadalang tao. Nagiging maselan ang pagdadalang tao kaya naman ay kailangang isaalang alang
o ikonsidera ang maayos na kalusugan, kailangan maayos ang timbang, taas at tamang edad upang
mabawasan ang paghihirap sa pagdadalang tao hanggang sa manganak. Maaaring maapektuhan
ang kalusugan ng bata kung ang ina ay hindi malusog at ang edad ay labinlima pababa.
Mahihirapan manganak ang mga payat o maliit na babae sa pangangak dahil sa maliit ang kanilang
pelvis na dinadaanan ng bata palabas ng sinapupunan. Kaya naman kadalasan ay nagreresulta na
lamang sa aborsyon o pagpapalaglag ang ginagawa upang hindi maranasan ang mga pagbabagong
nagaganap sa kanilang katawan. Ngunit posibleng magkaroon ng komplikasyon kung magpalaglag
ng bata. May mga kaso rin na natatakot ang mga kabataan sa mga magulang dahil sa ito ay
nabuntis. Lalo na kung ang pamilya nito ay konserbatibo. Dahil sa hayok at nadadala ng damdamin
ang karamihan sa mga kabataan ay malaki ang tiyansa na sila ay mapunta sa maling daan na
nagdudulot ng pagkasira ng kanilang buhay, halimbawa na lamang ay ang mapa barkada,
kadalasan ay pagbibisyo ang kanilang ginagawa katulad na lamang ng paninigarilyo, pag inom,
paggamit ng masamang droga at marami pang iba. Naaapektuhan din ang edukasyon ng isang bata
kapag siya ay maagang nabuntis, maraming kabataan ang nasira ang pag aaral dahil sa maagang
pagbubuntis maaaring tumigil ito sa pag aaral dahil sa maaaring kahihiyan ang matanggap sa
kanyang kapaligiran.
Maaaring sabihing ang teenage pregnancy ay isa sa mga sensitibong isyung panlipunan sa
kasalukuyan sa ating bansa. Ang ilan sa mga dahilan kung bakit ito’y nauuso sa mga kabataan ay
dahil sa kuryosidad at kakulangan ng kaalaman. Kapag sinabing sex, karamihan sa mga kabataan
ay tatawanan lamang ito. Ang hindi alam ng mga karamihan, ang teenage pregnancy ay isang
seryosong isyung panlipunan na kailangang bigyan pansin. Paano natin ito maiiwasan? Ang mga
magulang ay dapat bantayan ng mabuti ang mga anak. Dapat nilang mapag usapan ang isyung ito
sa kanilang kabahayan. Kailangang bigyang pansin ng mga magulang ang ginagawa at galaw ng
kanilang mga anak. Ang mga kabataan din ay kailangan matutong makinig sa mga magulang, dahil
para sa ikabubuti naman nila ang mga ito. Kung maaari, dapat iwasan muna ng mga kabataan ang
pagkakaroon ng relasyon dahil maaari lamang silang matukso. Huwag laging makikinig sa mga
kaibigan lalo na kung ito ay masamang impluwensiya. Iwasan muna ang mga bisyo, dahil maaari
itong humantong sa maling pag-iisip. Sa mga kabataang nagbabasa nito, sana ay bigyang pansin
nyo ang mga payong ito dahil para rin ito sa kinabukasan nyo. Kayo ang responsable sa inyong
mga ginagawang maaari ninyong pagsisihan sa huli.
Mahalaga ang tiyak at mas malawak na kaalaman tungkol sa sex education para sa mga
kabataan. Sa panahon natin ngayon ay laganap ang teenage pregnancy kung saan maraming
kabataan ang maagang nakabubuo ng pamilya at nanganganak ng wala pa sa tamang edad. Isa ang
kakulangan ng kaalaman sa reproductive health ang dahilan nito, kaya naman mahalagang isagawa
o isakatuparan ang sex education lalo na sa Pilipinas. Maraming kabataan ang nasisira ang buhay
at kinabukasan dahil dito, marami sa kanila ay tumitigil sa pag-aaral, bago pa man mabuntis o
habang buntis. Marami sa kanila ay nahihirapan ng mag-aral dahil sa kanilang bagong obligasyon.
Ang sanggol at ang ina ay maghihirap, at papahabain uli ang siklo ng kahirapan ng kanilang
pamilya. Ang mga kasong ito ay tiyak na mapapababa kung mabibigyan lamang ng tama at sapat
na kaalaman ang mga kabataan ukol sa sex education.
Ang teenage pregnancy o adolescent pregnancy ay nasa 10-19 na taong gulang. Bukod sa
masamang epekto sa kalusugan maaaring magdulot din ito ng social consequences tulad ng hindi
sa pag aaral, problema sa emosyonal at pinansyal na kailangan para sa pagpapalaki ng bata at
kahirapan sa paghahanap ng trabaho dahil sa murang edad. Sinasabing mainam gumamit ng mga
contraceptives tulad ng condom, birth control pills at iba pa upang maiwasan ang maagang
pagbubuntis, subalit ang family planning ang mas epektibong solusyon upang maiwasan ang
teenage pregnancy. Nararapat na mayroon tayong plano sa pagbuo ng pamilya upang maiwasan
natin ang agarang pagkakaroon ng anak lalong lalo na kung tayo ay wala pa sa hustong gulang at
wala pang sapat na pangtustos sa pang araw-araw na gastusin ng isang pamilya.
Ang pagpapatibay o pagpapatatag ng relasyon ng ating pamilya ay nakatutulong rin upang
maiwasan ang teenage pregnancy. Kung matatag ang relasyon ng pamilya, tayo ay mababantayan
nang mabuti ng ating mga magulang ay nagsisilbing ehemplo rin sila sa atin upang tayo ay
maghangad ng marangal na pamumuhay kaya naman makapagpopokus tayo sa pagkamit ng ating
pangarap at maiiwasan natin ang mga tukso gaya na lamang ng teenage pregnancy. Maging bukas
rin tayo sa ating mga magulang sa kung ano ang mga nangyari o nangyayari sa atin upang tayo ay
kanilang magabayan ng maayos at masasabi ang mga nararapat at hindi natin nararapat gawin.
Magiging kuntento rin tayo sa ating pamilya lalong lalo na tayo ay wala pa sa hustong gulang
upang bumuo ng sariling pamilya at tatatak rin sa ating isipan na hindi pa tayo handa sa ganitong
uri ng pamumuhay dahil hindi pa natin kaya nang wala ang tulong ng ating mga magulang at
malalaman rin natin ang ating mga limitasyon pagdating sa pagkakaroon ng relasyon habang tayo
ay wala pa sa hustong gulang.
Ang patuloy na pagtaas ng populasyon sa Pilipinas ay kaakibat nito ang patuloy na
paghirap ng bansa. Ayon sa World Population Review, nananatili pa rin sa ika-18 pwesto ang
Pilipinas sa pinakamahirap na bansa sa Asya; bagama’t bumaba ng isang porsyento ang poverty
incidence ng Pilipinas, isang malaking balakid pa rin ito sa mga taong nananatili sa bansa. Ang
kakulangan sa edukasyon at kaalaman patungkol sa sexualidad ay isa pa ring malaking dahilan
kung kaya’t maraming nabubuntis sa murang edad pa lamang na nakakaapekto sa paghirap at pagdami ng populasyon sa bansa. Ang naging unang hakbang ng gobyerno upang ma-solusyunan ang
teenage pregnancy ay sa pamamagitan ng pagsasabatas ng Senate Bill 161, naglalayon itong
magturo ng comprehensive sexuality education sa kabataan at pagtatalaga ng mga Prevention
Programs sa mga local na pamahalaan.
Gayunpaman, ang mga kabataan ay dapat na magkaroon ng mga adbentyur at hindi nila
dapat hayaang ang teenage pregnancy na maging hadlang sa kanilang pag-unlad. Dapat nating
alalahanin na ang pag-unawa at paggabay ay isang epektibong paraan upang maiwasan ang teenage
pregnancy at mapalaya ang mga kabataan sa iba't ibang panganib.