Eia Mai Ka Lā Ho‘oulu Pae Moku – E Kanu Kākou!
na Lopaka Weltman
Synopsis: The climate crisis threatens Hawai‘i with sea level rise and extreme weather events. One way to help
mitigate the effects is to plant trees across all the islands to bind the carbon from greenhouse gas emissions.
Join ReTree Hawaii at retree-hawaii.org to plant in November and make Hawai‘i more resilient, beautiful and
healthy.
Ahi ke kula kō i haʻalele ʻia ā mahakea me ke ʻano ikaika a pinepine, a ua hele a maʻamau ka pio ʻana o ka uila i ka
makani pāhili, a pi‘i ka ‘ilikai ā ho‘oweliweli i nā alanui a me nā hale kokoke i kahakai, a make nā manu Hawai‘i o
ka nahele e laʻa me ke kiwikiu i ka laha ‘ana i uka o ka makika lawe i ka malaria manu. ʻO ke kumu o ia pōʻino ka
ho‘omehana honua e ho‘oweliweli i ka pae ‘āina a ka honua holoʻokoʻa.
Kuʻi ka lono i kēlā me kēia lā e pili ana i ka loli ‘ana o ke aniau, me ka pi‘i ʻana o ka ‘ilikai a me nā pōpilikia
kūlohelohe like ‘ole. E ho‘omau anei ‘o Hawai‘i he ‘āina kū mai ke kai a‘e a hānai i kona po‘e i kēia mua aku, a i
ʻole piholo ka ʻāina momona o kapakai i ke kai? E aho ka ’eleu i kēia manawa.
‘Oiai, ‘o ke kumu nō o ka loli ‘ana o ke aniau ka pākela ho‘ohua ‘ana o ke kalapona ‘okikene lua, pono e hana me
ka ikaika loa no ke kāpae ‘ana i nā ‘enehana wāwahie mō‘alihaku a hoʻonui i ka ikehu hana hou e like me ka
ikehu lā a me ka ikehu makani nō ho‘i, a kuapo i nā ka’a ’enikini aila me nā ka’a ’enikina uila a i ‘ole haikokene.
Akā na‘e, i kēia manawa keu ‘ē ke kalapona ‘okikene lua i ke ea i ho‘ohua ‘ia ma mua. He aha ko kākou hana e
ho‘ēmi ai i ke kalapona ‘okikene lua?
Hahai nō ka ua i ka ululāʻau. He hoa kākoʻo ikaika nō ke kumu lāʻau a waiwai ke kanu ʻia ʻana o nā kumu
lā‘au like ‘ole ma nā wahi a pau o Hawai‘i nei. Ho‘opau ka lā‘au i ke kalapona ‘okikene lua, a ho‘ohua i ka
‘okikene. Ho‘omalu ka lā‘au i ka lepo i ka manawa ho‘okahi me ke kāohi i ka ‘a‘aiawā, a palena ‘ole nā
‘ano ho‘onani a ho‘owaiwai o ke kumu lā‘au.
No laila, ua ho‘okumu ‘ia ka hui ku‘ikahi ‘o Lā Ho‘oulu Pae Moku / ReTree Hawaii ma ka makahiki 2019
no ka ho’olālā wale nō i ke kanu ‘ana i nā lā‘au like ‘ole, a mau ka hana i ka mahina ‘Nowemapa o kēia
makahiki ma nā wahi nui wale o Hawai‘i nei. ‘O wai ia hui? Nui nā hui a me nā ‘ano kānaka like ’ole e
hana pū ma lalo o ReTree Hawai’i, e la’a nā hui kāko‘o kaiapuni, nā kula, nā pulo aupuni, nā hui
ho‘omaluō kaiapuni, nā kānaka kā‘oko‘a, a pēlā aku.
No ke aha e kanu ʻia ai nā kumu lāʻau ma ka mahina ʻNowemapa? Hele ia mahina ma mua o ka ho’oilo
ma Hawaiʻi, ʻoi aku hoʻi ka pahiki o ke ola ʻana o nā lāʻau.
E kipa mai e ka mea heluhelu i kahi paena pūnaewele puni honua https://retree-hawaii.org no ke a‘o
‘ana mai i nā ha‘awina koe o ke kumu lā‘au no ke kāko‘o i ke aniau a me nā wahi kani o ka lā ho‘oulu ma
nā mokupuni like ‘ole, e la’a ‘o Awaawa Waimea ma O’ahu, ‘o Maha’ulepu ma Kaua’i, ‘o Pāka Keālia ma
Maui, ‘o Pu’u Wa’awa’a ma Hawai’i, a pēlā aku.
‘O kahi punāewele puni honua https://retree-hawaii.org/planting/ nō kahi a ka mea heluhelu e ʻimi ai i
nā wahi kanu, a kahi paha no ke kākau inoa no ka hanalima ma kekahi wahi kanu. Hiki nō ho‘i ke kanu i
lāʻau ma ka hale i kēlā me kēia lā a hiki i ka lā hope loa o kēia makahiki, a laila kipa i ia loulou no ka hō‘ike
i ka helu a me ke ‘ano o nā lā‘au, a waiho i nā ki‘i. E hoʻonui ka huinanui pau loa o ka helu lāʻau me ka
helu e hoʻike ʻia ai ma laila. E kanu kumu lāʻau kākou no ka ho‘oulu i ka āina!