Mayo 8, 2022 IKA-UPAT NGA DOMINGO SA PASKO SA PAGKABANHAW Good Shepherd Sunday World Day of Prayer for Vocations PASIUNA: "Ang akong mga karnero mamati sa akong tingog. Nakaila ako kanila ug sila nagsunod kanako." (Juan 10:27). Si Jesus mitanyag og tataw nga kalainan kaysa ubang mga magbalantay sa karnero. Kini mahimong gamiton sa mga kaparian, sa mga ginikanan ug natong tanan sa atong kaugalingong talagsaong paagi. Ang kalainan nga iyang gitanyag kay Siya kinasingkasing man nga nag-amoma kanila nga gitugyan kaniya. Dili sama sa uban nga nagbantay lagi apan tinukmod diay sa ilang kahakog kaysa ilang gugma nga inubanan og sakripisyo. Sa hingpit si Jesus nagpadayag sa iyang gugma inubanag sakripisyo isip Diosnong Magbalantay. Andam ug tagana siyang mohimo sa tanan tungod ug alang kanato nga iyang panon. Andam siyang mosakripisyo sa tanan gayod. Wala niya tugoti ang pagantus, pagpanglutos, pagsalikway ug uban pa nga mopakgang Kaniya sa iyang katungdanan sa pag-atiman ug pag-amoma kanato sa kinatibuk-an ug sa kompletong paagi. Modasig, mohupay ug motukmod unta kini kanato sayod kita unsa kalawom ang iyang gugma alang kanato sa tinuoray gayod. Kining maong gugma makita usab diha sa walay paglubad nga gugma sa usa ka ginikanan, sa usa ka igsuon, o sa usa ka suod nga higala. Sa higayon nga ang gitanyag nga gugma walay paglubad, ilabina panahon sa mga kalisdanan, kini dako gayod kaayong suporta. Ug ingon niining gugma nga gitanyag ngadto sa uban makamugna og halawom nga espirituhanong panaghiusa nga mas lig-on pa sa bisan unsang kalisdanan nga atong sagubangon. Bisan unsang lobo ang atong masugatan, kinahanglang sayod kita sa walay paglubad nga suporta sa Diosnong Magbalantay. Ug kon masaksihan nato kanang gugma nga mapadayag diha sa walay paglubad nga suporta sa uban, makaduha kita nahimong bulahan. Apan ang kalainan dili unta nato ibaliwala. Si Jesus mihatag kanatog panig-inga sa “usa ka sinuholan nga dili gayod tinuod nga magbalantay”, kay inigkakita niya sa lobo nga magsingabot modagan hinoon siya ug mosibat. Mahinungdanon nga atong ipakita ang kadaut nga mahimo niining tawhana ngadto sa katawhan sa Dios. Kon mobiya si sa iyang katungdanan ug paundayonan ang iyang hinakog nga motibo, ug biyaan niya ang iyang panon nga walay nagbantay ug daling mabuntog sa mga pag-atake. Wala siyay hinungdan! PAMALANDONG: Sa akong pagka-magbalantay unsa man ang akong mga kakulangan? Gitugotan ba nako ang Magbalantay nga mobantay kanako sa ingon ako maantigo usab nga mobantay sa uban? Midangop ba ako sa Maayong Magbalantay ug misalig sa iyang hingpit nga gugma alang kanako?