Modernong Bayanihan: Gabay Aral Tutor at BRB4 Paminggalan sa panahon ng
pandemya.
Isinulat ni
Maria Cecilia R. San Jose
Morong National High School-SHS
Mahigit isang taon na ang nakalipas mula ng maranasan ng buong mundo ang
pandemyang dala ng COVID 19. Nagkaroon ng mga bagong normal na pamamaraan ng
pamumuhay lalo na sa larangan ng edukasyon.
Malaking hamon ang naranasan ng kagawaran sa patuloy na pag-arangkada ng
bagong normal na edukasyon sa ilalim ng iba’t ibang learning modalities.
Adbokasya ng Dibisyon ng Rizal na maitaas ang antas ng karunungan sa pagbabasa ng
mga batang Rizaleno kung kaya’t inilunsad ang ‘Barangayan Para sa Bawat Bata
Bumabasa (BRB4) kaagapay ang mga boluntaryong mamamayan na “Gabay Aral Tutor’
na tutulong sa pagpapabasa ng mga kabataang Rizaleno.
Simbolo ng pag-asa ang mga asul na banderitas na nakakabit sa piling lugar ng ating
kumunidad. Ito ay nangahulugang mayroong gabay aral guro o tutor sa kanilang lugar
na handang magbigay ng oras at serbisyo para matulungan ang mga batang Rizaleño.
Kabilang sa nagbigay ng kanyang pagsuporta si Dea Gavas Solayao, 33 taong gulang,
may asawa at apat na anak na nag-aaral sa Maybancal Elementary School (MES) sa
Morong, Rizal.
Tawag Ng Pagtulong
Ang pagtulong ay mahalagang konsepto at kultura ng mga Pilipino. Isang kawanggawa
na hindi naghahangad ng kapalit at nanggagaling sa puso.
Bago pa magkaroon ng COVID 19, madalas nang makita si Dea na nagtuturo ng kaniyang
mga anak at sa mga pagkakataong ito’y sumasali ang mga kalaro ng mga ito.
Kaya nang ilunsad ang BR-B4 at alukin siya ni Bb. Melanie Ticaro, koordineytor ng BRB4 ng MES.
Ayon kay Solayao, binigyan siya ng oryentasyon tungkol sa programa ng pagbasa, kung
ano-ano ang mga gagawin at matapos noon ay pinapirma siya ng kasunduan ng
boluntaryong paglahok sa nasabing proyekto.
“Pangarap kong maging guro ngunit kahit hindi ko ito natapos at dahil sa pagiging Gabay
Aral Tutor ko, nabigyan ako ng pagkakataong matupad ito kahit ako po ay simpleng
maybahay lamang. Isa pong karangalan para sakin na mapabilang sa ganitong
programa,” masayang wika ni Solayao.
Gamit ang mga modyul na binigay ng paaralan tinuturuan niyang magbasa ang mga bata
sa kanilang looban na nagsimula lamang sa walong mga bata.
Pusong Gabay Aral Tutor
Ang paglilingkod sa pamayanan ay gawaing kahanga-hanga. Hindi lahat ay kayang
maglaan ng kanyang oras, pagod at minsan ay may kasama pang pinansyal. Malayang
kagustuhan na makatulong sa kapwa o maging bahagi ng isang gawain tulad ng pagiging
Gabay Aral Tutor na malaking bagay sa panahon na patuloy nan a nakikipagbuno ang
lahat sa epekto ng pandemya.
“Nang magsimula po ako sa pagtuturo halos walong bata lang sila . Dahil maliit lang ang
aming lugar, sa bakanteng lote ko tinuturuuan ang mga bata. Pinagdala ko sila ng sarili
nilang mga upuan dahil hindi sapat ang silya naming upang ipagamit sa kanila. Pinagdala
ko rin sila ng papel,bolpen at kailangang may suot na facemask at faceshield”
Ayon pa kay Mam Dea, may mga batang ang dala lamang ay balde na itinataob para
maging upuan nito habang tinuturuan niya.
“Tuwang-tuwa ang mga magulang ng mga bata na ang iba ay aking mga kapitbahay ko
dahil nagiging abala ang mga anak nila, natututo at nalalayo sa madalas na paggamit na
kanilang mga cellphone, “ kwento pa ni Solayao.
Naniniwala siya na kung pano niya sinusuportahan ang kanyang mga anak kasama ng
mga batang kaniyang tinuturuan, ganun din ang suportang gagawin ng mga ito balang
araw sa kanilang magiging mga anak at sa kanilang kapwa.
Sa kabila ng kaabalahan sa gawaing bahay, pag-aalaga ng kaniyang mga anak,
paggabay sa pagsasagot ng mga modyul ng mga ito at pagtitinda nagagawa pa rin
niyang magturo sa mga bata araw-araw bilang Gabay Aral Tutor .
BR-B4 Paminggalan ng Komunidad at ang pagbasa
Pagtulong sa kapwa ang naging inspirasyon ni Patreng Non sa kanyang Maginhawa
Community Pantry na sa wikang Filipino ay “Paminggalan ng Komunidad”.
Hindi man bago ang konsepto ng Community Pantry, nangingibabaw ang pagtulong at
pagbibigay sa kapwa sa panahon ng pangangailanganng kaya mahigit sa 200 na
community pantry ang naitayo sa iba’t ibang bahagi ng bansa
"Magbigay ayon sa kakahayan, kumuha batay sa pangangailangan," yan ang mensahe
sa bawat community pantry sa buong bansa
Samantala, kabilang sa naantig ng ganitong gawain si Solayao. Nagbuo din siya ng
kaniyang sariling community pantry sa kanilang lugar at iniuunay niya ito sa kanyang
gawain bilang BR-B4 Gabay Aral Tutor.
“Upang mas marami akong mahikayat na sumali sa aming pagbabasa, nagbibigay ako
ng mga kendi, biskwit at juice pagkatapos naming mag-aral magbasa,” sabi ni Solayao.
Inamin niyang hindi nya kayang tustusan ang ganito lalo’t araw-araw dati ang kanyang
pagtuturo, kaya may pagkakataong nangangalakal siya upang may maibili ng kanyang
pamigay sa mga batang tinuturuan niya.
“Naging epektibo naman ang aking ginawa dahil mula sa walo ay umabot ito ng 20 na
bata. May mga bata pa na mula sa ibang barangay ang gusting sumali sa amin ngunit
tinanggihan ko muna bilang pag-iingat sa COVID-19,” ani ni Mam Dea.
Pumukaw sa marami ang kanyang islogang "Bumasa ayon sa kakayahan at kumuha
ayon sa gantimpalang nakalaan batay sa kakayahang bumasa." Kung kaya’t may mga
napapadala na ng tulong sa kaniya kabilang na ang MES sa pamumuno ni Gng. Corina
DJ. Condez,principal ng paaralan.
Pag-asam
Magkakaiba man ang mga pananaw, paniniwala at pamamaraan kung paaanong
maipagpapatuloy ang buhay sa kabila ng pandemya, ang pagkakaisa ng bawat Filipino
sa mga gawaing katulad ng mga paminggalang pangkomunidad at pagiging BR-B4
Gabay Aral Tutor ay nagpapasigla ng modernong bayanihan sa pamayanan.
Nangingibabaw ang pagtulong at pagbibigay sa kapwa sa panahon ng pangangailangan.
“Naniniwala po ako na balang araw wala ng bata sa Rizal ang hindi marunong bumasa
at ang ganitong gawain ay magpapatuloy kahit wala na ang pandemya"
Dagdag pa ni Solayao na mas lumawak pa ito, mas dumami ang mga taong magiging
katuwang ng paaralan sa pagpapabasa upang walang batang maiiwan sa pagbasa at
pag-unawa sa kaniyang binasa. Dumami pa ang mga taong patuloy na susuporta upang
maitawid ang mga pangangailangan ng kaniyang community pantry at higit sa lahat mas
maraming bata ang magkaroon ng motibasyon na matutong bumasa.
Lahat ay may kakayanang tumulong at magbahagi ng kaniyang kakayahan. Malayang
desisyong na sana lahat ay magkaroon upang ang modernong bayanihan ng community
pantry at BR-B4 Gabay Aral Tutor ay mas maging matagumpay.