Detyrë portofoli. Tema: 11 rregulla se si do të jem i/ e suksesshme Punoi: Krisdona Zyka; XII¹ Secili prej nesh ka një perceptim të ndryshëm për termin “sukses”. Dikush ka besimin se suksesi mund të arrihet vetëm me anë të forcave vetjake, punës së palodhur dhe disiplines ndërsa të tjerë kërkojnë ta arrijne atë në rrugë më të thjeshta por jo të drejta apo të ndershme. Nga ana tjetër suksesi mund të shihet në këndvështrime të ndryshme dhe mund ti përkasi fushave të ndryshme por hapat për ta arritur atë mbeten të njëjta. 1.Fillesa e suksesit ose ndryshe themeli i tij është pasioni dhe dëshira. Nëse doni të jeni të suksesshëm në jetë, qoftë në profesionin tuaj apo edhe në aktivitete me të cilat kaloni kohën e lirë duhet të zgjidhni atë që doni vërtet me gjithë zemër. 2.Edhe pse pasioni është zanafilla e suksesit, ajo që duhet ta pasojë atë është të qenit i mirë në atë që synoni. Puna e palodhur për tu rritur si karakter apo edhe nga ana profesionale nuk duhet të rreshti kurrë gjatë gjithë jetës. Njohuritë dhe rrugët për tu përmirësuar dhe për të ecur përpara janë të pafundme…thjesht mjafton tja nisësh nga diku dhe çdo gjë tjetër vjen si rrjedhojë e saj. 3.Të dish kur dhe nga kush të kërkosh ndihmë në situata të vështira. Të punosh me veten tënde është njëra anë e medaljes por ka raste kur është mëse e nevojshme të gjesh mbështetje tek dikush tjetër. Askush nuk është i gjithëditur ndaj të dish kur të kërkosh ndihmë do të thotë të dish pikat e tua të dobëta, të njohësh veten tënde dhe kjo të jep mundësinë për tu përmirësuar më tej. 4.Të fokusohesh tek qëllimet e tua. Të pasurit e një vizioni të qartë i cili patjetër mund të vijë në formën e tij më të mirë me kalimin e kohës shërben si një shteg që të drejton për të qenë i suksesshëm në atë që do. 5.Disiplina dhe të qenit konsistent në të punuarit me veten, për qëllimin tuaj mbetet një pikë e rëndësishme e cila është dëshmuar nga njerëz shumë të suksesshëm si Xhef Bezos (Jeff Bezos), Serena Uilljams ( Serena Williams) apo drejtuesi i kompanisë “Apple” Tim Kuk (Tim Cook). 6.Shiko gjithnjë për ide të reja dhe ji sa më krijues. Krijimtaria nuk të lë kurrë në baltë. Mund të frymëzohesh nga persona të ndryshëm por gjithmonë zgjidh me vendosmëri të shtosh shijen dhe idetë e tua. Të jesh unik në rrugën e suksesit do të thotë të jesh i paarritshëm nga të tjerët. 7.Nuk duhet të kufizoheni në asnjë moment nga fjalët dhe paragjykimet e të tjerëve. Besimi në vetvete është ai që do tju ndihmojë ta shtyni veten tuaj përtej limiteve. Dukeqenëse je ti që e jeton jetën tënde askush tjetër nuk ju ndalon dot për të arritur majat e suksesit . 8.Rrethojeni veten me njerëz që ju shtyjnë drejt më të mirës suaj, që ju motivojnë dhe mos lejoni asnjë tjetër t’ju thojë të kundërtën. Mbështetja është një element mjaft ndihmues në rrugën e të qenit të suksesshëm ndaj bëni zgjedhje të kujdesshme. 9.Të jetosh jetën pa u penduar për gabimet që bën. Ato janë një mënyrë mjaft e mirë e cila të udhëzon si të ringrihesh për të kaluar situatat e vështira dhe për tu përmirësuar. Të gjithë gabojmë por që të jesh i suksesshëm duhet të mësosh nga gabimet. 10.Shfrytëzo mundësitë që të jepen me zgjuarsi dhe nëse ato janë të pakta kërkoji diku tjetër pasi në këtë botë ato janë të pafundme. Shikoji gjërat me një këndvështrim të ri. Reflekto për ato çka të ofrohen sepse kështu mund të gjesh gjithmonë një rrugë tjetër për të arritur atë që do. 11.Gjërat e mira bëhen me ngadalë dhe siguri, ndaj durimi është faktor kyç në të qenit i suksesshëm. Merrini vendimet me qetësi dhe maturi pasi vendimet e nxituara nuk ju çojnë askund. I merrni parasysh të gjitha mundësitë dhe zgjidhni më të mirën e mundshme e kështu suksesi do të jetë edhe një hap tjetër më pranë jush.