BAPTISMA
Bible Chang Inghahna: Matthaia 28:19,20 Rom 6:4
Lieut. Vanlaltharzuala
Baptisma tih thumal hian Kristian Sakhuaah hmun pawimawh tak a chang a, tin Kristian Sakhaw peng hrang hrangah hman thin a ni bawk a ni.
Amaherawhchu, hman dan a inan tak hlawm loh avangin inhnialna chawkchhuak thei tak a ni ve bawk a. A thenin a thlawr a thlawr an hman laiin
thenkhat erawh chuan hnim phum te leh lu atanga leih te an hmang a, tin thenkhat chuan taksa pum chiah a baptisma chang te pawh an awm ve bawk
a ni. Heti hi a nih si chuan a eng ber nge hman tur tih Bible in min zirtir leh Salvation Army in Tui Baptisma kan hman ve loh chhan tawi tein han
zir tum ila.
Tripura Chief Minister hi eng ang mi nge a ni tih kan hriatchian dawn chuan khawi hmunah nge a pian tih te, kum engzah nge a nih te, a nu leh pa
hming leh eng sakhua nge a vawn tih te kan hriatchian a ngaih ang hian Baptisma tih thumal hi eng tawng atanga rawn kal nge a nih tih te leh a tobul
kan chhui ve a ngai a ni.
A TOBUL LEH BIBLE A A HMANNA THENKHAT TE
Baptisma tih hi Greek tawng ‘Baptistos’ tih atanga lakchhuah a ni a. A tawng bulah chuan baptise/ bapto tih a ni a, chumi awmzia chu hnim emaw
phum tihna a ni.
Bible a Bapto/Baptis hmanna hrang hrang te:
a. Luka 16:24 “Ka pa Abraham, mi khawngaih la Lazara kha han tir rawh, a kutzung hmawr tuiah chiah sela ka lei tihdaihna turin; he meialh
ah hian ka na em em a ni”. Heta a kutzung hmawr tuia chiah tih hi bapto kan tih a chu a ni.
b. Johana 13:26,27 “Chhang them ka chiahsaka ka peka chu a ni ang”. Lal Isuan amah mantirtu tur a sawi naah khan, amah mantirtu tura kha
chhang them a chiah sak a, chuta chhang them a zuk ‘chiah’ chu bapto chu a ni.
c. Thupuan 19:13 “Puan Thisen kai a sin a; a hmingah chuan Pathian Thua an ti a”. Heta puan thisen kai kan tih a hi bapto kan tih chu a ni.
Mi tam takin Baptis tih thumal hi mihring tui a thlawr emaw, tuia chiah emaw ah chauh hman theih ah kan ngai fo thin a. Baptis kan tih hi mihring
chungchangah te thawmhnaw chungchangah te leh bungrua emaw hmanruaah pawh hman ni se baptis tih tawngkama hi hman theih a ni a.
Thawmhnaw tui a kan chiah emaw, beramno thisen a chiah emaw, mihring taksa, a pum ni kher lovin kan taksa hmawr emaw tuiah emaw thil dang
engemaw ah kan chiah hian baptis tih tawngkam hi a hman theih a ni. Tin hmanrua emaw bungrua kan silfai hian Bible in min zirtir naah chuan
Baptis tih tawngkam hi a hman theih bawk a ni.
TU TE TAN A BUATSAIH NGE
Thuthlunghluiah chuan baptisma - tui a inchiah hi hman thin a ni a, Juda Israel te ah hman thin a ni. Pathian biakna atana silfaina leh tlenfaina
(MVILAH) atan baptisma hi an hmang thin a, Pathian an biak dawnin anmahni an in tifai emaw an insilfai thin a, Leviticus 14:4-9 kan en chuan mi
bawlhlawh chu tui a silfai thin tur tih kan hmu a ni. Tin Temple rawngbawltu in serh leh sang an khawih dawnin tuiah an insilfai hmasa thin a,
chutah chuan Bapto tih tawngkam hi a hman theih a ni.
Johana Baptisma chu Simna Baptisma ti a hriat a ni a, chu chu Lal Isua lo kalna tur atana kawng lo sialtu kha a ni. Lal Isua Krista ngei pawh khan
Johana Baptisma hi chang vein Pathian ram chanchin a hril a, chumi awmzia chu Pathian ram lo thleng tur atan kawng a lo sial lawk tihna a ni.
Johana Baptisma kan tih a hi Juda-Israel kan tih bik te tan a ni a, Johana 1:31 ah chuan, “Amah chu ka lo hre silo; nimahsela Israelten amah an hriat
theih nan, tuia baptis-in ka lo kal a ni.” tiin Baptistu Johana khan a sawi a ni. Chumi awmzia chu Israel ten Isua an hriat theih nan Johana hi tlangau
angin Israel hnam tan tui a baptis turin a lo kal a ni. Lal Isua’n tui baptisma a chan ve avang hian kan sipai huang chhungah pawh ngaih thalo riau a
tui baptisma chang leh nulh pawh kan awm fo mai, Lal Isua kha Juda mi, Juda hnam a piang a ni a, chuvang chuan Juda dan a Sakhuana leh Pathian
biakna kalkawng a zawh ve kha a tih a mawi em em a ni. Amah Isua ngeiin tui baptisma a chan dawn khan khan Baptistu Johana hnenah heti hian
a sawi a, “Tunah rem ti hram rawh, hetianga felna zawng zawng hlen chhuah hi ka tan a mawi a ni” tiin.
SALVATION ARMY IN BAPTISMA A PAWM DAN
“Chutichuan kal ula, hnam tin a mi zirtirahte siam ula,Pa leh Fapa leh Thlarau Thiianghlim hmingah chuan baptis ula, thu ka pek zawng zawng che
u pawm turin zirtir rawh u”(Matthaia 28:19,20) ti a thu pek kan ni a. Hetilai Bible changah hian tuiah ni lovin Thlarau Thianghlim hming a Baptisma
chang tur kan nihzia a tarlang chiang hle awm e. “Chuvangin a thihnaah baptisma kan chanin, a hnena phum vein kan awm; Pa ropuinain mitthi zing
ata Krista a kaihthawh ang khan, keini pawh nunna tharin kan awm theih nan.”(Rom 6:4). Mihringah hian khawilai tak hi nge baptis ngai tih hi kan
ngaihtuah ngun a ngai hle mai, kan taksa chu keimahni ngei pawhin tui leh sahbawn hmang pawhin kan silfai thei a, amaherawhchu keimahni a
baptis ngai ber chu kan sualna hi a ni. Hla thu chuan “tui zawng zawngin ka sualna a tleng thei lo”, a tih ang hian chu kan sualna tlengfai tur chuan
Thlarau Thianghlim Baptisma chang a, Tirhkoh Paulan a lo sawi ang khian, tuiah nilovin Lal Isua Krista thihna leh thawhlehnaah chuan Baptis kan
ngai a ni.
Lal Isua khan kan sualna zawng zawng chu phurin Kraws ah a thihpui tawh a, tichuan thlanah kan sualna zawng zawng chu phum (baptis) bo niin,
a nithum tukah chu thihna leh sual chu hnehin felna thuam famkim nen a lo tho leh ta tih kan hriat ang khan, chu a thihna leh thawhlena tawmpui a
pawm tu apiang chu Thlarau Thianghlim Baptisma chang, Salvation Army in Baptisma kan pawm dan a chu a ni tih kan hriat a pawimawh em em
a ni.
Salvation Army hian Baptisma tak channa tur atana entirna, tui hmanga baptisma inchantir hi tul a ti ve lova, chutih rual erawh chuan a hmang
kohhran te erawh a demin a sawi chhe kher lo a ni. Kohhran unau thenkhat chuan tui baptisma hi lei lam chhinchhiahna ni a ngaiin thenkhat erawh
chuan tui baptisma hmang lo erawh chu Kristian nilo leh Vanramah hmun chang ve lo tur a ngai an awm bawk. Tin tui baptisma hmang kohhran
hrang hrang te hian an hman dan a in ang lo tlang hle mai a, a hmasa lama tarlan tak ang khian a thenin tui a thlawr an hman lai in thenkhat chu an
inhnim a, thenkhat in taksa pum lu atanga an leih laiin thenkhat erawh chu an chhip chiah an ti huh ve thung. Hei hian baptisma hman dik chungchang
ah inhnialna nasa tak a chawk chhuak thei tih hriain Salvation Army chuan tui hmang a baptisma chan hi tul a ti lova, Baptisma tak Lal Isua Kristan
min pek Thlarau Thianghlim Baptisma hi kan ring a ni.