Isang mapagpalang araw sa inyong lahat, ako si Jhaniz Raven Mendaro. Narito ako sainyong harapan upang ibahagi ang aking saloobin ukol sa eleksiyong pang Presidente sa darating na taong 2022. Umaasang sa pamamagitan ng aking plataporma ay magkaroon ng impluwensiya sa inyo ang aking mga salita upang maliwanagan sa tamang pagpili ng nararapat na mamumuno sa ating bansa Ayon sa Philippine News, Ang demokrasya ay isang sistema ng pamamahala kung saan ang mga taong bayan ay may kapangyarihang ilagay sa pwesto ang taong gusto nilang mamumuno. Dahil dito, ang demokrasya ang matatawag na “kapangyarihan ng tao”. Kadalasan, ating makikita ang demokrasya sa isang politikong konteksto. Ito ay mahalaga dahil sa pamamagitan ng demokrasya, maipapahayag ng mga ordinaryong tao at miyembro ng komyunidad ang kanilang mga pananaw. Ang kapangyarihan o karapatan na ipinagkaloob sa atin ay nararapat lamang na gamitin sa tama at huwag ipag walang-bahala ang kalayaang ito. Sa pagpiling ito hindi tayong mga miyembro ng lipunan ang magkakalaban, hindi ito ang tamang pagtatalo sa kung sino ang gusto at hindi gustong kandidato ng bawat isa. Tama na ang bangayan, oras na para magkaisa tayo na buksan ang ating mga mata at suriin gamit ang ating isipan kung sino sa mga kandidato ang may angking kakayahan at malasakit Ang nangyayaring pandemiya sa panahong ito at kaliwa’t kanang isyu ay isang malaking dahilan upang gamitin natin ang ating pagboto nang tama alang-alang sa kapwa natin mamamayang Pilipino at sa kinabukasan ng ating bansang ginagalawan. Ang pagpili ng nararapat na umupo sa puwesto ng isang lider ay hindi dapat isakripisyo kapalit ng pera, ito ay isang bagay na dapat nating isa puso at isipan dahil dito nakasalalay ang inaasam-asam na katahimikan kasama ng pagbabalik ng buhay na nakasanayang normal dalawang taon na ang nakalilipas. Bilang isang kabataan, botante at responsableng mamamayan ng bansang ito, narito ako at nais ibahagi sa inyo ang mga nalikom kong mga hakbang at mga bagay na dapat isa-alang-alang sa pagkilala sa mga maaaring maging pinuno ng bansa. Nawa, maging daan ang aking mga salita upang kahit papaano ay maliwanagan kayo kung nararapat ba ang kandidatong inyong napupusuan. Ang pagkakaroon ng kaalaman kung sinong pulitiko ay napakahalaga sapagkat sa pamamagitan nito ay magkakaroon tayo ng kaalaman sa kanilang buhay at maliliwanagan tayo sa kung anong klaseng tao ba ang mga Una, alamin ang leadership background o karanasan sa pamumuno at performance ng kandidato. Ang sapat na karanasan sa liderato ay maaring maging batayan sapagkat may abilidad na siya sa pamamalakad sa isang lipunan at sa pagtupad sa kaniyang tungkulin. Kung siya man nagkaroon na ng posisyon sa gobyerno bago siya kumandidato sa pagkapangulo, alamin kung paano siya mamuno. Ikalawa, isa-alang-alang ang mga puna o batikos ng ibang tao sa mga kandidato, ngunit huwag basta-basta maniniwala. Magsagawa ng pag-aaral o pumunta sa mga website na may tamang impormasyon. Ang mga taong nasa paligid natin ay may mga kaalaman rin sa pagboto. Ngunit lagi natin tatandaan na hindi lahat ng naririnig sa paligid ay dapat paniwalaan, lalo pa at maraming gumagawa ng paninira sa mga kandidato tuwing panahon ng eleksiyon. Ikatlo, alamin ang mga nangungunang isyu at kung sinong kandidato ang may pag-aasam na sugpuin ang mga ito sa pamamagitan ng kanilang sariling paraan. Ang kanilang mga plano ay dapat makatotohanan, huwag basta-basta maniniwala sa kanilang salita, mangangailangan tayo ng buong pusong pagsusuri dahil ang mga kandidato ay madalas gumamit ng mga salitang mabubulaklak upang makuha ang ating loob. Ikaapat, panoorin ang kanilang debate at public discussion o mga non-partisan tv shows, radio shows, at online sites na nagpapakilala sa kandidato. Suriin kung paano sila sumagot sa mga katanungan, kung paano nila idepensa ang kanilang sarili sa mga pambabatikos ng taong bayan gayun din ang kanilang kaibahan sa isa’t isa. Alamin ang kanilang mga layunin at mga nais na gawin kung sakaling sila ay palaring manalo. Ang kandidatong malinaw ang layunin at may malasakit sa Pilipino ay isang magandang pangitain na siya ay may kakayahang maging Pangulo. Ang panghuli, batay sa iyong mga nakalap na impormasyon, salain ang mga kandidatong nararapat sa iyong boto. Ikaw ang makakapag desisyon kung sino para sa iyo ang may angking kakayahan sa pamumuno at maaring maging daan sa ninanais na pagbabago. Ang iyong kandidatong napili ay nararapat lamang na hindi kasali sa mga iligal na gawain at hindi sumusuporta sa ano mang bagay na masama Ang mga nabanggit kong hakbang ay batay lamang sa aking kaalaman, wala akong intensyong paninira sa mga kandidato sa pagka Presidente. Isa ring akong Pilipino na naghahangad ng pagbabago para sa kapwa ko mamamayan, nais ko rin ng mabuting pamamalakad at bansang ligtas sa korupsiyon at iba pang maling panunungkulan ng gobyerno. Katulad ninyo, ako ay humihiling na sana makamit na ng bansang ito ang mabuting pinuno na makapagbibigay ng magandang buhay sa bawat isa sa atin. Bilang pagtatapos, lubos ang aking pasasalamat sa pagkakataong ito na naibahagi ko ang aking saloobin sa pamamagitan ng talumpati na ito. Nawa, ang aking layunin ay maisakatuparan na pukawin ng aking boses ang inyong puso at isipan na ang pagbabago at kinabukasan ng lipunan na ito ay nasa ating nang kamay. Huwag sana nating ipagkaloob ang anim na taong panunungkulan sa Presidenteng magiging sakit sa ulo lamang ng mga Pilipino. Pumili tayo ng Pangulong handa tayong ipanalo. Maging dilat nawa tayo sa katotohanan. Sa lahat ng mga Pilipino na may pusong makabansa’t makabayan, maging responsableng mamamayan nawa tayo ng republikang ito. Muli, isang napakagandang araw po sa ating lahat.