79th Araw ng Kagitingan and Phiippine Veterans Week
ORATORICAL PIECE
Tema: “Kagitingan ay gawing gabay,pandemya ay
mapagtatagumpayan”.
Sa mga panauhing pandangal, sa mga walang kapagurang
kagalang-galang na mga hurado, kapita-pitagang mga Inang Kalahi, mga
kapwa ko mananalumpati, mamarapatin kong batiin kayo ng isang
matiwasay at kaaya-ayang umaga. Lubos ang kagalakang aking
nadarama ngayon na mabigyan ng pagkakataon na makapagsalita sa
inyong harapan.
Pitumpu’t siyam na taon na ang nakalipas nang walang takot at
buong tapang na ipinagtanggol ng mga Pilipino at Amerikanong sundalo
ang kalayaan ng sambayanang Pilipino. Libo-libo sa kanila ang nagbuwis
ng buhay patunay ng kanilang kagitingan, na kahit pa kamatayan ang
kapalit ay handa sila sa ngalan ng kanilang bayan at kalayaan. Kaya sa
tuwing sasapit ang ika-siyam ng Abril ang buong bansa ay magbaliktanaw at bigyang-pugay ang kabayanihan ng mga beteranong Pilipino at
Amerikano sa Ikalawang Digmaang Pandaigdig. Tunay ngang nagpaalala
sa atin ang Dambana ng Kagitingan sa Samat, Bataan di lamang sa tayog
ng kadakilaang inihandog ng ating mga kawal kundi, sa lalim at lawak ng
kanilang sakripisyo sa ngalan ng kanilang kapwa at bayan.
Rizal, Bonifacio, Mabini, Aguinaldo, Del Pilar. Iilan lamang sila sa
mga kilalang bayaning Pilipinong gigunita natin. Magkakaiba man ang
kanilang mga pananaw at adhikain sa buhay. Magkakasalungat man ang
mga paraang ginagamit nila sa pagtatanggol sa Inang Bayan, subalit
magkaganoon man ay iisa lang ang kanilang hangarin, kalayaan at
kaunlaran ng bayang minamahal.
Marami pang mga Pilipino ang
sumunod sa kanilang mga yapak, mga Pilipinong nagtanggol sa simulain
at adhikain ng isang bansang magsasarili at may hangaring umunlad, ng
bansang nangarap makawala sa mga pagsubok at sakuna.
Lahat nang ito’y maliwanang na nakatala sa dahon ng ating
kasaysayan. Matapos ang halos isang siglo, nanatiling matingkad ang
itinuro sa atin ng nagdaang panahon.
Batid natin na kailanman ay hindi matutumbasan ng magarbong
seremonya o pag-aalay ng mga bulaklak ang tunay na halaga ng ginawa
ng ating mga beterano. Kaya naman kasabay sa pagbabalik-tanaw sa
kabayanihan ng mga Pilipinong nagmalasakit at patuloy na nagmalasakit
sa bansa ay pagtitingala at pagsasaludo sa kanilang kagitingan ang
nararapat nating ibigay. Binigyan nila ng inspirasyon ang bawat Pilipino
na isapuso ang tunay na kabuluhan ng kagitingan.
Kasabay sa paggunita ng mga magigiting na bayani ay ang
pagdiriwang ng Philippine Veterans Week kung saan ay kasalukuyang
nakatutok sa pagpapatupad ng batas. Ito ay ang Filipino Veteran’s Equity
Compensation Law. Ang batas na ito ay lubos na nakatuon sa kalusugan
at kapakanan ng ating mga beterano.
Ito ay mga inisyatibong nakakabit sa pagtanaw ng utang na loob sa
di matatawarang pag-aalay ng sarili ng ating mga beterano. Sa ating
pagbibigay-pugay sa kanila ay gawin nating patnubay ang kanilang mga
mabubuting halimbawa.
Ganitong katapangan ang hinihingi sa atin ng pagkakataon ngayon.
Nahaharap tayo ngayon sa isang pandaigdigang krisis dahil sa
pandemyang Covid-19, ngunit hindi ito hadlang upang ipakita ang diwa
ng malayang sambayanan ang patuloy na pagbibigay ng pag-asa. Tulad
ng Bataan noon, nababalot tayo ng kadiliman ngayon dahil sa banta ng
Covid19. Marami sa atin ang nagsakripisyo, nagdusa ang nawalan.
Alalahanin natin ang katapangan ng ating mga beterano sa Bataan.
Magsisindi ito ng panibagong pag-asa, pag-asa na matatagumpayan natin
ang giyera para sa ligtas na kinabukasan para sa lahat. Na mapanalunan
natin ang laban na ito upang magkaroon ng malayang bansa, isang
malayang Pilipinas mula sa sakit na dulot ng Covid-19.
Huwag din nating iwaglit sa ating isipan ang kabayanihan ng ating
mga frontliners at healthworkers sa panahong ito na walang sawa at
higit pa ang ibinibigay na paglilingkod mabigyan lamang ng tamang
aruga ang mga maysakit. Kasama rin sa kuwento ng katapangan ang
mga volunteers na abot ang tulong sa mga nangangailangan. Maaring
ihalintulad natin ang kanilang katapangan sa mga kawal na Pilipinong
nagtanggol ng kalayaan noong Ikalawang Digmaang Pandaigdig. Ang
tagumpay na makakamit ng sambayanan sa hinaharap laban sa
pandemya ay magsisilbing Ikalawang Araw ng Kagitingan sa “Bagong
Henerasyon” ng mga Pilipino. Magiting! Matatag, at buo ang loob.
Mapagkalinga sa isa’t isa at may matibay na pananalig sa Diyos. Sa
Bataan itinatag ang last line of defense laban sa mga Hapon. Ngayon ang
ating mga “Bagong Bayani” ang mga frontliners ang ating last line of
defense laban sa Covid-19.
Ang giyera ay naipanalo hindi lamang ng mga frontliners natin
kundi ng buong sambayanan. Kailangan po nating tulungan ang ating
mga bagong bayani—ang ating mga doctor, nars at mga healthworkers
na nagbuwis ng kanilang buhay upang gamutin ang mga kapwa natin
Pilipino na dinapuan ng virus.
Ang pagpuksa ng Coronavirus ay laban nating lahat. Sama-sama
nating malalampasan at madadaig ang hamon ng panahong ito. Walang
Pilipino na tatawaging magiting na nag –iisa. Sama-sama tayo! Tulong –
tulong tayo! At sa pag gabay ng diwa ng mga bayani ng Bataan, hawakkamay tayo sa pagbangon mula sa pagkalugmok na dulot ng pandemya.
Mapanalunan natin ito. Anumang banta sa kapayapaan ngayon, ano
mang banta sa kalusugan dulot ng pandemya ay kaya nating sugpuin.
Tayo po ay magkaisa at magtulungan. Maging responsible at kumapit
tayo sa pag-asa. Ang bukas ay hindi pa natin nasisiguro. Bawat landas na
tatahakin at may tinik na nagsisilbing hamon ng ating kakayahang
kumilos bilang mga mamamayan. Pero sa gabay at ehemplo ng
kabaynihan at kagitingan ng mga bayani ng ating lahi matitiyak natin ang
matagumpay na landas na ating tutunguhin. Ang kagitingan ng ating mga
bayani ang ating sandigan sa pakikipagsapalaran sa pagbabagong dulot
ng Covid19. Pananalig sa Diyos ay paigtingin pa natin. Ipagdasal natin na
pagkalooban tayo ng Diyos ng ibayong lakas para makabangon muli.
Ako. Ikaw. Tayong lahat. Gawin nating pinakamabisang kalasag o
depensa ng ating Inang Kalahi ang alaala ng kagitingan na ating mga
bayani. Iisipin natin na hindi hadlang ang pandemya sa pagsulong sa
kapakanan at pagtaguyod ng malawakang kapayapaan. Kailangan natin
ang matibay na kooperasyon at ugnayan gaya ng ating mga magigiting
na bayani sa pagpapatupad ng pambansang batas na taos-puso nating
sundin upang mabigyang-tuldok ang pandemyang ito.
Magkaisa tayong lumaban ng buong tapang. Sa sama-sama
nating pagharap sa kalaban na hindi natin nakikita,humuhugot tayo ng
inspirasyon mula sa mga halimbawang ipinamalas ng mga bayani at
sundalo natin. Hindi tayo dapat panghinaan ng loob. Hindi ito panahon
para sumuko, sapagkat ang pagsuko ay karuwagan. Pagsikapan nating
tapatan ang katapangan nila na lumaban hanggang sa kahuli-hulihan sa
panahong sinusubok ang ating katatagan.
Tulad ng isang katagang binigkas ng isa sa magigiting na anak ng
ating bayan, “Bataan has fallen, but the spirit that made it stand
cannot fall.”
Nawa’y maging tanda ang kagitingan ng ating mga bayani upang
magpunyagi pa tayo sa pagkamit ng pagkakaisa at pagtutulungan tungo
sa magandang bukas. Sa isip, sa salita at sa gawa, itaguyod at
ipagpatuloy pa natin ang pagbabayanihan tungo sa malaya at ligtas na
bansang Pilipinas.
Magtatagumpay Tayo !
Maraming salamat Po !
At Mabuhay ang Sambayanang Pilipino!