FILIPINO
Mangha, pagsang-ayon, at galak - iyan ang mga pangunahing reaksyong napukaw
sa aking damdamin habang pinanonood ko ang nasabing video. Labis akong namangha
sa bawat salita at pananaw ng mga guro ukol sa wikang Filipino sapagkat kakikitaan
ang mga iyon ng labis nilang pagmamahal sa ating wika. Hindi ko tuloy mapigilang
maisip na sana ay lahat ng Pilipino, katulad nila sa larangan ng pagtataguyod sa ating
wika. Dahil kung ganoon nga, tiyak na hindi na mapipigilan ang pag-unlad ng ating
bansa. Isa pang nakakuha ng aking atensyon ay ang pahayag ni Ginang Aquino na ang
wika ang kaluluwa ng bansa. Nang mamutawi ang mga katagang iyon sa kanyang labi
ay hindi ko na talaga naiwasang hindi maantig sapagkat lubhang totoo ito - ang wikang
Filipino ang ating pagkakakilanlan. Namangha rin ako sa kung paano tinalakay sa video
ang kahalagahan ng wikang Filipino sa buhay ng isang mag-aaral na tulad ko. At sa
kanilang pagtalakay dito ay hindi ko na napigilan ang lubos na pagsang-ayon. Tunay na
ang wikang Filipino ang magpapakita sa ating mga mag-aaral ng tradisyong ating
pinanggalingan gaya ng sinabi ni Ginang Cleto. Ito ang tulay sa pagitan ng mga
mamamayan at mga mananaliksik. At sa pamamagitan nito, nalilinang ang ating
katauhan.