1. Ano ang titulo ng sining biswal na ito? Ang sining biswal na ito ay may titulong ‘One Spring Day at Rouge River’ (Isang Araw ng Tagsibol sa Ilog ng Rouge). 2. Sino si Marissa Buyco-Corpus at paano nakaapekto ang mga nangyari sa buhay niya para makalikha siya ng sining na ito? Si Marissa Buyco-Corpus, liban sa pagiging artista ng biswal-sining ay isang ina, manunulat, pinuno ng komunidad, at negosyante. Si Marissa bilang artista ay isa sa mga miyembro ng Philippine Artists Group (PAG) ng Canada, isang samahan ng mga migranteng Pilipino sa Canada na naglalayong magtanghal ng pinakamahuhusay na sining-biswal, gumawa ng mas marami pang eksibisyon nang may mataas na pamantayan at may tungkuling magsagawa ng mga gawaing pansining sa propesyonal na pamamaraan. Siya rin ay masugid na kolektor ng sining para sa sining. Hindi niya ito tinitingnan na isang pagwawaldas ng pera. Para sa kanya ang sining ay isang mabuting investment. Nagsimula siyang mahulog sa sining nang makatanggap siya ng isang scholarship sa loob ng anim na buwan mula sa pamahalaang Dutch. Bumalik siya sa pag-aaral sa Netherlands at nagkaroon ng pagkakataong bisitahin ang mga gallery ng sining sa Europa sa paglalakbay niya. Nang masilayan niya ang Mona Lisa sa Louvre, mga gawa nina Van Gogh, Monet, Rembrandt nang personal ay mas lalo niyang pinahalagahan ang kagandahan at kamanghamanghang mga sining. Ang koleksyon niya ay makukulay na landscapes at mga tema ng mag-ina. Kalaunan ang mga tanawin din sa kaniyang paglalakbay ang kadalasang paksa ng kaniyang mga obra, kabilang na rito ang ‘One Spring Day at Rouge River’. 3. Anu-ano ang ginamit niyang kagamitan upang mabuo ito? Ang mga kagamitan niya ay oil acrylic bilang midyum upang ipinta ang nasabing tanawin bilang kaniyang paksa. 4. Base sa mga simbolo o sa mga "signs" na nakikita mo sa larawan na ito. Ano ang ibig sabihin ng larawan na ito? (Dapat iba ang sagot mo sa ibig pahiwatig ni Buyco-Corpus sa kanyang sining) Ang larawang ito ay nagpapakita ng mga palatandaan ng karikitan ng Rouge River sa panahon ng tagsibol. Ang tagsibol ay panahon kung saan lubusang sumisikat ang araw, nagkakakulay ang kaparangan, ang kabundukan ay muling nagkakaroon ng sigla, ang mga puno ay muling nagkakaroon ng malalagong dahon at ang mga bulaklak ay untiunting namumukadkad. Ang Rouge River sa panahong ito ay kahali-halina na napaliligiran ng mayayabong na puno at umuusbong na bulaklak. Sumasagitsit ang preskong hangin buhat sa mga halaman kasabay ang marahang lagaslas ng tubig. Ang larawan ay waring nagpapamalas ng musika sa pandinig bukod sa kagalakang biswal. 5. Ano ang kahulugan ng larawan na ito ayon kay Buyco-Corpus? Ang akdang-biswal na ito ay maituturing ni Buyco-Corpus bilang sining para sa sining (art for art’s sake). Ang terminong ito ay nangangahulugang paglikha ng sining dahil ang sining ay mahalaga bahagi ng buhay ng tao. Ang konsepto na ang sining ay hindi nangangailangan ng anumang paglilinaw o pagbibigay-katwiran. Hindi nito kinakailangang maghatid ng anomang layunin, pagkat ang kagandahan mismo ng sining ay sapat nang may katuturan. Samakatuwid, ang likhang sining mismo ay nagtataglay ng halaga, dahil sa nilikha ito. Ang pilosopiyang sining para sa sining ay nagmula pa noong ika-19 siglo mula kay Victor Cousin, isang pilosopo ng Pransya. 6. Ano ang mahihinuha mo mula sa kahulugan na nakuha mo sining na ito at sa kahulugan ng sining na ginawa ni Buyco-Corpus? Pagsamahin ang dalawang kahulugan at gawan ng hinuha. Mahihinuha na malalim ang pagpapahalaga ni Buyco-Corpus sa sining dahil para sa kanya ang tunay na sining ay kapaki-pakinabang batay sa internal nitong halaga, na hindi ito kinakailangang langkapan ng malalim na layunin. Sapat na ang aesthetika, pagpapahayag o di kaya ay kasiyahang pansarili mismo ng manlilikha. Siya rin ay mahilig sa pagpinta ng mga tanawing nadaraan niya sa paglalakbay sa iba’t ibang bansa. Halimbawa ng obra niyang may temang landscapes ang ‘One Spring Day at Rouge River.’ Maaaring ang sining para kay Buyco-Corpus ay isang pagmulat sa kahalagahan nito (awakening) na maihahalintulad sa mga halaman sa kasagsagan ng tagsibol sa Ilog ng Rouge. Kagaya ng pag-usbong ng pagmamahal niya sa sining, nagsimula siya bilang kolektor tungo sa pagiging manlilikha dahil naghahatid ito sa kanya ng purong kasiyahan. Kung iuugnay sa kanyang pintang larawan, ipinahihiwatig na sumisibol sa loob ng isang sining-biswal ang kagandahang dulot nito sa pandama. Maaaring marinig, mamasdan, maamoy o mahawakan ang isang likhang-sining. Higit sa lahat, ito ay mahalagang pagsipat sa paglago ng isang tao. Mga Sanggunian AtinitoAdmin. (n.d.). The Art and Science of Investing in Art. Atin Ito. Mula sa https://www.atinitonews.com/2021/02/the-art-and-science-of-investing-inart Marissa Buyco-Corpus. (n.d.). Philippine Artists Group of Canada PAG | Visual Artists Toronto Canada. Mula sa https://philippineartists.com/marissa-buycocorpus/?fbclid=IwAR39V9sqCbJQO8UhNCa_DFHFfssGjbks-iu4FLZfX0GVCUaSHhAP_XGvcg What Is Art For Art’s Sake (And Why You Should Adopt It As Your Artistic Credo). (2020, November 17). Art by Ro. Mula sa https://artbyro.com/art-for-artssake/